Jóseph dóó Mary éí Jesus dóó bilahkéí Názarethgi dabighan. Jóseph kin ííłʼíní nilı̨́įgo bighan hazʼą́ągi yee yikʼi naaldzil, áádóó Jiihóvah bibee hazʼáanii yee neinitin. Áłah náʼádleeh biniyé synagoguegóó tʼáá ahąąh ałnánákah, áádóó tʼáá nináháhááh bikʼeh Atisʼadeesdzá biniyé Jerúsalemgóó ałnánákah.

Jesus 12 binááhaigo bighan hazʼą́ yił, Jerúsalemgóó yikai. Éí tʼáá nináháhááh bikʼeh akǫ́ǫ́ ałnánákah. Ákweʼé Atisʼadeesdzá biniyé diné tʼóó ahayóí áłah nilı̨́. Éí bíighah azlı̨́įʼgo Jóseph dóó Mary haghangóó dah nízhdiikaigo, Jesus shı̨́ı̨́ bił atah ooldah jiniizı̨́ı̨́ʼ. Ndi hakʼéí bitah Jesus hazhdínéeztą́ąʼgo tʼáadoo bikʼízhníʼáazh da.

Jerúsalemgóó tʼą́ą́ʼ bíká anázhníítą́ą́ʼ, áádóó tááʼ yiską́ągo kin biiʼ sohodizin góneʼ bikʼízhníʼáázh. Ákweʼé Jesus éí nidaʼnitinígíí ałníiʼgi sidáago, hazhóʼó yiyíistsʼą́ąʼgo nayídíłkid. Nidaʼnitinígíí éí Jesus yaa dahaznih, áádóó nátʼą́ą́ʼ nidahódíłkid. Jesus nátʼą́ą́ʼ  yee hahaasdzíʼígíí yikʼee bił adahayóí. Jesus éí Jiihóvah yee hazʼáanii hazhóʼó yikʼidiʼyiitįįhgo yaa ákodaniizı̨́ı̨́ʼ.

Jóseph dóó Mary Jesus yąąh bíniʼ. Mary ání: ‘Shiyáázh, tʼáá ałtsogóó chʼééh níkaniitáá ńtʼééʼ. Háadish nanináá ńtʼééʼ?ʼ Jesus áhodííniid: ‘Daʼ shiTaaʼ bá naashʼaʼ dooleełígíísh doo nihił bééhózin da?’

Jesus éí Jóseph dóó Mary Názarethgóó yił anáákai. Jóseph éí kin álʼı̨́įgi Jesus yee neineeztą́ą́ʼ. Jesus ániid naagháahgo, haitʼéego bééhoʼdílzin ńtʼééʼ? Éí hojíyą́ągo Diyin God índa diné bił jílı̨́įgo jinoosééł.