Иосиф ӕмӕ Марийӕ цардысты Назареты, ӕмӕ ма сын Йесойы йеддӕмӕ ноджыдӕр уыди фырттӕ ӕмӕ чызджытӕ. Иосиф, хъӕддӕсныйы куыст кӕй кодта, уый фӕрцы йӕ бинонты дардта. Уымӕй уӕлдай ма сын Йегъовӕйы тыххӕй дзырдта ӕмӕ сын йӕ Закъон амыдта. Ӕдзух-иу цыдысты ӕмбырдгӕнӕнмӕ Йегъовӕйӕн кувынмӕ, афӕдз иу хатт та – Иерусалиммӕ Куадзӕн бӕрӕг кӕнынмӕ.

Гъемӕ та иухатт Иосифы бинонтӕ Иерусалиммӕ Куадзӕны бӕрӕгбонмӕ араст сты. Хъуыди сӕ дард фӕндагыл цӕуын. Йесойыл уӕд цыди 12 азы. Уырдӕм уыйбӕрц адӕм ӕрцыди, ӕмӕ дзы фезмӕлӕн дӕр нӕ уыд. Бӕрӕгбоны фӕстӕ Иосиф ӕмӕ Марийӕ фӕстӕмӕ сӕхимӕ аздӕхтысты, ӕмӕ афтӕ ӕнхъӕлдтой, ӕмӕ Йесо дӕр фӕстейӕ кӕмдӕр сӕ хиуӕттимӕ фӕцӕуы. Фӕлӕ йӕ агурын куы райдыдтой, уӕд ӕй не ссардтой.

Уӕд Иосиф ӕмӕ Марийӕ фӕстӕмӕ Иерусалиммӕ аздӕхтысты ӕмӕ ӕртӕ боны уым Йесойы фӕцагуырдтой. Ӕппынфӕстаг бацыдысты кувӕндонмӕ ӕмӕ уым Йесойы ахуыргӕнджытимӕ бадгӕйӕ ӕрбаййӕфтой.  Уый сӕм лӕмбынӕг хъуыста ӕмӕ сӕм фарстатӕ лӕвӕрдта. Йесо уыцы ахуыргӕнджыты ахӕм дисы бафтыдта, ӕмӕ йӕм сӕхӕдӕг райдыдтой фарстатӕ дӕттын. Ӕмӕ сын цы дзуаппытӕ лӕвӕрдта, уыдоныл дис кодтой. Уыдон федтой, Йесо Йегъовӕйы Закъон хорз кӕй зоны, уый.

Иосиф ӕмӕ Марийӕ тынг тыхст уыдысты. Марийӕ загъта: «Хъӕбул, кӕм уыдтӕ, кӕм? Цас дӕ фӕцагуырдтам!» Йесо сын загъта: «Ӕмӕ йӕ нӕ зыдтат, ам, мӕ Фыды хӕдзары, кӕй хъуамӕ уон?»

Йесо йӕ ныййарджытимӕ фӕстӕмӕ Назаретмӕ аздӕхт. Иосиф ӕй ахуыр кодта хъӕддӕсныйы куыстыл. Куыд хъуыды кӕныс, Йесо ӕрыгонӕй цавӕр адӕймаг уыд? Йесо куыд рӕзыд, афтӕ зондджынӕй-зондджындӕр кодта, ӕмӕ йӕ Хуыцау дӕр ӕмӕ адӕм дӕр уарзтой.