Josef un Maria wonden met Jesus un äare aundre Säns un Dajchta toop en Nazaret. Josef schauft aus Holtoabeida toom fa siene Famielje sorjen, un hee lieed dee von Jehova un von sien Jesaz. De Famielje jinkj pinkjlich no de Judenschool toom Gott aunbäden un jinkj uk jieda Joa no Jerusalem toom Passafast.

Aus Jesus 12 Joa wia, muak siene Famielje de lange Reis no Jerusalem soo aus emma. De Staut wia voll Menschen, waut toom Passafast jekomen wieren. No daut Fast jeewen Josef un Maria sikj oppem Wajch trigj no Hus un dochten, Jesus wia uk mank dee, waut doa met an toop reisden. Oba aus see doa mank äa Frintschoft no dän sochten, fungen see dän nich.

Dee jinjen trigj no Jerusalem un sochten dree Doag lank no äaren Sän. Tolatst jinjen see nom Tempel. Doa wia Jesus. Dee saut doa medden manke Lierasch, horcht sea too un stald goode Froagen. De Lierasch wieren soo vewundat äwa Jesus, daut see aunfungen, dän  Froagen to stalen. Un dee tieeden sikj äwa dän siene Auntwuaten. Dee kunnen seenen, daut Jesus Jehova sien Jesaz vestonen kunn.

Josef un Maria hauden sikj groote Sorjen jemoakt. Maria säd: “Mien Kjint, wie haben aulawäajen no die jesocht! Wua wieescht du?” Jesus säd: “Wist jie nich, daut ekj en mienen Voda sien Hus sennen must?”

Jesus jinkj met siene Elren toop no Hus no Nazaret. Josef lieed Jesus, Holtoabeit to doonen. Waut jleefst du, woo wia Jesus, aus dee ella wort? Aus dee oppwoss, kjrieech dee emma mea Weisheit un Gott un de Menschen räakjenden dän emma mea.