Josewan Mariawanqa Nazaretpi tiyakorqanku Jesuswan, waj qhari wawasninkuwan, warmi wawasninkuwan ima. Joseqa carpintero karqa. Chay trabajonwantaj familianta uywarqa. Chantapis familianman Jehová Diosmanta, Leymanta ima yachacherqa. Sinagogamanpis familianta Diosta yupaychanankupaj pusallajpuni, Jerusalenmanpis sapa wata pusaj Pascuata ruwanankupaj.

Jesús 12 watasniyoj kashajtin familianqa yachasqa kasqankuman jina Jerusalenman rerqanku. Jerusalenqa runamanta juntʼa kasharqa. Fiesta tukukusqantawan Josewan Mariawanqa wasinkuman kutiporqanku. Yuyarqankutaj Jesús familiaresninkuwan khuska rishasqanta. Jinapis maskʼaspa mana tarerqankuchu.

Chayrayku Jerusalenman kutirispa Jesusta kinsa diata maskʼarqanku. Templopitaj tarerqanku, yachachejkunaj chaupinkupi tiyasqata. Payqa chay yachachejkunata uyarispa, tapurispa ima kasharqa. Yachachejkunataj imatachus Jesús nisqanmanta mayta  tʼukorqanku, tapuytataj qallarerqanku. Kutichisqanmantataj mayta tʼukullarqankutaj. Repararqankutaj Jehová Diospa Leyninta sumajta entiendesqanta.

Josewan Mariawanqa mayta llakikorqanku. Chayrayku María nerqa: “Wawáy, kaypi kashasqankeqa. Tukuynejpi maskʼayku”, nispa. Jesustaj nerqa: “¿Manachu yacharqankichej Tataypa wasinpi kashanayta?”, nispa.

Jesusqa tatasninwan Nazaretman kutiporqa. Josetaj payman carpinteriata yachacherqa. Payqa kʼacha wawa karqa. Chantá wiñallarqapuni, aswan yachayniyojmantaj tukorqa. Chayrayku Jesustaqa Diospis, runaspis munakoj kanku.