José xuqujeʼ María e kʼo pa Nazaret rukʼ Jesús xuqujeʼ ri e nikʼaj chi kalkʼwal. José xchakun che ajanel rech kuya ri kajwataj che ri ufamilia. Xuqujeʼ, xeʼutijoj chrij ri e upixabʼ Jehová xuqujeʼ chrij ri e utaqanik. Ri familia amaqʼel kebʼe pa ri sinagoga rech kkiqʼijilaj Dios xuqujeʼ kebʼe pa Jerusalén che uqʼaxexik ri Pascua ronojel taq junabʼ.

Are chiʼ Jesús kʼo 12 ujunabʼ, ri ufamilia xebʼe pa Jerusalén, junam rukʼ ri kkibʼan amaqʼel. Ri tinamit nojinaq chke winaq che xuqujeʼ e bʼenaq che uqʼaxexik ri Pascua. Are chi xkʼis ri nimaqʼij, José xuqujeʼ María xkimaj ri bʼe rech ketzalij cho kachoch kkichomaj che Jesús kʼo chixoʼl ri e kifamiliares. Are kʼu chiʼ xkitzukuj chkixoʼl ri jupuq, xkiriq taj.

Rumal laʼ xetzalij pa Jerusalén oxibʼ qʼij xkitzukuj ri kalkʼwal. Kʼisbʼal re, xkiriq pa ri rachoch Dios. Chilaʼ kʼo wi Jesús, tʼuyul chkixoʼl ri ajtijabʼ, tajin keʼutatabʼej xuqujeʼ kubʼan utz taq preguntas chke. Ri ajtijabʼ kkimay ri kubʼij Jesús chke e areʼ xuqujeʼ kkibʼan preguntas che. Sibʼalaj kkimay ri kubʼij. Xkilo che qas kuchʼobʼ ri Utaqanik Jehová.

 José xuqujeʼ María sibʼalaj xebʼisonik. María xubʼij che: «Wal, at qatzukum pa ronojel lugar. ¿Jachiʼ at kʼo wi?». Jesús xubʼij: «¿La mat iwetaʼm che rajawaxik kinkʼojiʼ pa rachoch ri nuTat?».

Jesús xtzalij kukʼ ri utat unan pa Nazaret. Chilaʼ, José xukʼut ri chak re ajanik chuwach Jesús. ¿Jas kachomaj? ¿Jas ubʼanik riʼ Jesús are chiʼ ala na? Jesús xkʼiy más xuqujeʼ xubʼan más nim ri unojibʼal. Rumal laʼ, ri Dios xuqujeʼ ri winaq utz xkilo.