Josepish Mariapish Jesushuan paipaj caishuj churi ushushicunahuanmi Nazaretpi causarcacuna. Joseca paipaj familiata mantiningapajmi carpintero carca. Paica Jehovamanta, paipaj mandashcacunatapish yachachijmi carca. Tucui familiami Diosta adorangapaj sinagogaman rijcuna carca. Shinallataj tucui huatacunami Jerusalenman rishpa Pascua fiestata rurajcuna carca.

Jesús 12 huatacunata charijpica tucui familiacunami Jerusalenman rircacuna. Chai llajtamanca achca gentecunami pascua fiestata rurangapaj rishcacuna carca. Ña Pascua fiesta tucurijpica Josepish Mariapish paicunapaj huasimanmi tigracurcacuna. Paicunaca familiapurapimi Jesusca shamucunga nishpami yuyarcacuna. Pero mashcajpica mana ricurircachu.

Chaimantami Jerusalenman tigrashpa quimsa punllacunata Jesusta mashcarcacuna. Diospaj huasipimi paitaca japircacuna. Jesusca yachachijcunata tapushpa, ima nijta uyashpami paicunapaj chaupipi tiyacurca. Cutin yachachijcunaca Jesús ima nishcata uyashpami  achcata mancharishpa paita tapui callarircacuna. Ima shina cutichijta uyashpami Dios mandashcacunata Jesús alli intindishcata ricurcacuna.

Josepish Mariapish achcatami sustarircacuna. Mariaca, ‘huahua ¿ima nishpataj cashna ruranguiyari? Achcata mancharishpamari mashcacurcanchij’ nircami. Jesusca, ‘ñuca Yayapaj huasipi cana cashcataca ¿manachu yacharcanguichij?’ nishpami cutichirca.

Jesusca paipaj yaya mamandijmi Nazaretman tigrarca. Chaipimi Joseca paipaj trabajota Jesusman yachachirca. Caita yuyai. ¿Joven cashpaca Jesusca ima shinashi carca? Jesusca ashtahuan huiñashpami yachaisapa runa tucurca. Chaimantami Diospish gentecunapish paitaca achcata cꞌuyarca.