Joseywan Mariam, Jesuswan chaynataq wakin warmankunapiwan Nazaret llaqtapi yacharqaku. Joseyqa ayllunta uywananpaqmi carpintero karqa, hinaspapas Jehova Diospa kamachikuyninmantam ayllunman yachachiq. Chaynapim Diosta yupaychana wasiman llapanku sapa kuti riqku, chaymantapas Jerusalenmanmi sapa wata pascua fiestaman riqku.

Chaymi 12 watanpi Jesus kachkaptin Jerusalenman rirqaku pascua fiestaman, chaypim achkallaña runakuna karqaku. Chay fiesta tukuytam Joseywan Mariaqa wasinkumanña kutirqaku, paykunaqa piensarqakum wakin ayllunkuwan Jesus risqanta, ichaqa Jesusta mana tarispankum llakisqallaña maskayta qallaykurqaku.

Chaymi Jerusalenman kutirqaku, hinaspam kimsa punchawmantaña Diospa templonpi tarirurqaku. Chaypim Jesusqa yachachiqkunapa chawpinpi uyarispa tiyachkasqa, hinaspapas tukuytam tapukuchkasqa. Chay yachachiqkunaqa musyarurqakum Diospa  kamachikuyninkunamanta sumaqta Jesus yachasqanta, chaymi ima niytapas mana atispanku paykunaña tapuyta qallaykurqaku.

Mariaqa llakisqalla kaspanmi Jesusta nirqa: “Wawalláy, ¿maypitaq karqanki? Maykunapiñach maskamuykikupas”, nispa. Jesusñataqmi nirqa: “¿Manachu yacharqankichik taytaypa wasinpi kanayta?”, nispa.

Chaymantam Jesusqa tayta-mamanwan Nazaretman kutirqaku, chaypim Joseyqa Jesusta yachachirqa carpintero kananpaq. Jesusqa wiñaruspanmi astawan yachaysapallaña karqa. Chaynapim Jehova Diospas chaynataq runakunapas kuyarqaku.