Mariawan Josewanqa Nazaret llaqtapin tiyaranku. Chaypin Jesusta juj wawankunatapas uywaranku. Joseqa carpinteriapin llank’aran familianta uywananpaq, Diosmantapas yachachiranmi. Sapa semanan sinagogata riqku Jehová Diosta adoraq, Jerusalentapas sapa watan viajaqku Pascua fiestapaq.

Jesús 12 watanpi kashaqtinmi familianqa costumbrenkuman jina Jerusalenta Pascua fiestapaq viajaranku. Llaqtapiqa junt’an runakuna kasharanku. Fiesta tukuytan Josepas Mariapas llaqtankuman kutimpusharanku, paykunaqa nirankun: “Jesusqa jujkunawanchá jamushan”, nispa. Maskhaspankun ichaqa mana tarirankuchu.

Jinan Jerusalenman kutispanku kinsa p’unchay maskharanku. Chay qhepamanmi templota riranku, jinaspa chaypi tariranku. Jesusqa yachachiqkunaq chaupinpi tiyaykuspan tukuy yuyaywan uyarishasqa tapushasqa ima. Yachachiqkunaqa anchatan admirakuranku  Jesuspa yachasqanwan, chaymi imaymanata tapuranku. Paykunaqa repararankun Diospa kamachikuyninkunata allinta entiendesqanta.

Josewan Mariawanqa sinchi llakisqan kasharanku, chaymi Mariaqa niran: “¡Waway, tukuy ladopin maskhamuraykiku! ¿Maypin kasharanki?”, nispa. Jesustaq niran: “¿Manachu yacharankichis papaypa wasinpi kanayta?”, nispa.

Jesusqa tayta-mamanwanmi Nazaret-ta kutipuran. Joseqa yachachiranmi Jesusman carpinteriapi llank’ayta. ¿Imaynan Jesús karan waynallaraq kashaspa? Wiñasqanman jinan aswan yachayniyoq kapuran, runakunapas Jehová Diospas allinpaqmi qhawariranku.