Josepash, Mariapash, Jesushuan paipa caishuj churicunandi, ushicunandimi Nazaret pueblopi causan carca. Joseca paipa familiata mantiningapaj carpintero shina trabajashpapash, Jehovapa Leymandapashmi familiamanga yachachin carca. Joseca paipa familiandimi Diosta adorangapaj templo huasiman rina costumbreta charirca. Shinallata Pascua fiesta punllacuna chayajpipash cada huatami Jerusalenman rin carca.

‘Chai fiestaman rinata yachashpami Jesús ña chunga ishcai huatata charijpi, Jerusalenman rinajurca’. Jerusalenbica Pascua fiestaman rishca gentecunami junda carca. Chai fiesta punllacuna tucurijpimi Josepash Mariapash paicunapa huasiman tigranajurca. Familiacunahuanmi Jesusca rijun yashpami paicunaca cungashca rinajurca. Shinapash Jesusta mascajpica na ricurircachu.

Chaimi Josepash, Mariapash Jerusalenman tigrashpa Jesusta mascanajurca. Quimsa punlla jipami Jesustaca ‘Diospa huasi ucupi, mandashca shimita yachachijcuna villajpi uyashpa, imagutapash tapushpa, paicunapa chaupipi tiajujta’ tarirca. Diospa huasipi yachachijcuna imatapash tapujpi Jesús ali yuyashpa tigrachijpimi, paicunaca ninanda manllarinajurca. Shinami paicunaca Jesús Jehovapa Leyta alipacha intindishcata cuenta japirca.

 Josepash, Mariapash ninandami preocuparishca carca. Chaimi Mariaca Jesusta cashna nirca: Ñuca huahualla, Taitandi ñucandimi ninanda llaquirishpa mascashpa shamunchi ¿maipita carcanguiyari? nishpa. Shina nijpimi Jesusca nirca: “Ñucataca, na mascanachu carcanguichi. Ñuca Taitapajta ruranapacha cajtaca, ¿nachu yacharcanguichi?” nishpa.

Jesusca paipa taitamamahuanmi Nazaret puebloman tigrarca. Chaipimi Joseca carpintero shina trabajanata Jesusmanga yachachirca. ¿Imatata yuyangui? ¿Jesús joven cashpaca imashinashi carca? ‘Jesusca viñashpandi, aliguta yachajushpandimi catijurca’. Chaimi Taita Diospash, gentecunapash Jesustaca ashtahuan juyan carca.