O Josif hem i Marija živindže ko Nazaret zajedno e Isuseja hem peklje avere čhavencar. O Josif brinindža pe peklje porodicače adžahar so čerdža buti sar stolari hem sikavdža pe porodica ando Jehova hem oljeso Zakon. On redovno dželje ki sinagoga te šaj te služinen e Jehovase hem svako berš dželje ko Jerusalim te slavinen i Pasha.

Ked o Isus hine lje 12 berš, oljesi porodica podžindža ko baro drumo dži o Jerusalim sar so čerdže svako berš. I diz hine pherdi manušencar so alje te slavinen i Pasha. Palo prazniko, o Josif hem i Marija podžindže te džan pese čhere. On mislindže so o Isus tano oljencar ki odija grupa. Ama, ked dikhlje so ov nane oljenge familijaja, počmindže te roden lje.

Tegani, o Josif hem i Marija irindže pe ko Jerusalim hem trin dive rodindže pe čhave. Ko krajo, arakhlje lje ko hram. Odothe o Isus bešlja maškar o učiteljija, šundža šukar hem pučlja ljen phare pučiba. O učiteljija hine oduševime e Isuseja hem počmindže te  pučen lje razna pučiba. Oljese odgovorija but zadivindže ljen. Šaj hine jasno te dikhen so o Isus šukar haljola e Jehovaso zakon.

O Josif hem i Marija but brinindže pe. I Marija phendža: „Mo čhavo, nane than kuri na rodindžam tut! Kaj hijan lje?“ O Isus odgovorindža: „Na džandžen li so me valjani te ovav ko me Dadeso čher?“

O Isus irindža pe čhere peklje roditeljencar. O Josif sikavdža e Isuse te ovel šukar stolari. So mislineja, sar terno čhavo, savo hine o Isus? Dži barilo, o Isus ulo but mudro hem o Devel hem o manuša but manglje lje.