О Иосифо и Мария вместе лэ Иисусоса и аврэ шавэнца и щеянца жувэнас андо Назарето. О Иосифо терэлас бути анда каш и важ када пэр лэстэ ԥэнэнас плотнико. Кадэлэса во затерэлас ловэ важ о ери. Во росԥэнэнас пэстирэ бэятонэнди пала Иегова и пала лэско законо. Всаворэ ереса вонэ ԥирэнас андэ синагога, када цэр, кай прожалас и собрания. Кадяжэ вонэ еқвар андо бэрш ԥирэнас пэ патради андо Иерусалимо.

Кала лэ Иисусости сас 12 бэрш, вся лэско ери жылэ баро дром андо Иерусалимо. Кадя вонэ терэнас кажно бэрш. Андэ кадэя время андо форо сас бут мануша, савэ авэнас пэ патради. Сар прожыля о празднико, о Иосифо и Мария жылэ цэрэ. Вонэ гиндонас, кай о Иисусо жал всаворэнца. Но кала вонэ линэ лэс тэ родэн машкар пэско родо, вонэ лэс на виарақлэ.

Вонэ рисайлэ андо Иерусалимо и трин дес андэ всаворэ ҭана родэ лэ Иисусос. И акэ вонэ виарақлэ лэс андо храмо. Во бэшэлас паша мануша, савэ сытярэнас андо храмо, драго ашунэлас лэн и пушэлас  кода, пэр со лэнди сас ԥарэс тэ ԥэнэн. Вонэ диқлэ, пэ скати дэ годявэрно бэято, и линэ екжэнэ тэ пушэн лэстар. Вонэ динэ наздив, кай о бэято кадя дэл дума. Вонэ полинэ, кай во драго ӷанэн лэ Иеговаско законо.

О Иосифо и Мария фартэ загиндонаспэ. И Мария ԥэндя: «Амаро шаворо, амэ тут родям андэ всаворэ ҭана! Кай ту санас?» О Иисусо ԥэндя лэ родителёнэнди: «Мэ сымас андо лэ дадэско цэр. Кай инке манди тэ авав?»

После када о Иисусо лэ родителёнэнца рисайля цэрэ андо Назарето. О Иосифо сытярэлас лэс, кай во тэ терэл кацави же бути, сар во. Савэ бэятоса сас о Иисусо? Во барёлас, ашэлас май годявэрно и во со май фартэ чалёлас лэ Дэвлэсти и лэ манушэнди.