Zuze na Mariya akhakhala ku Nazareti pabodzi na Yezu na anawo anango amuna na akazi. Zuze akhaphata basa yakupala matabwa toera kutsalakana banjace, pontho akhapfundzisambo banjace thangwi ya Yahova na Mwambo wace. Banja ineyi ikhaenda kalambira Yahova ku sinagoga mwakukhonda phonya, pontho ikhaendambo ku Paskwa ku Yerusalemu kabodzi pacaka.

Mukhakhala Yezu na pyaka 12 pyakubalwa, Zuze na banjace acita ulendo wakulapha kuenda ku Yerusalemu ninga mukhacitira iwo pacaka. Nzinda ukhadzala na anthu akuti akhaenda kacita phwando ya Paskwa. Mudamala phwando ineyi, Zuze na banjace atoma kucita ulendo wakubwerera kunyumba kwawo, mbakanyerezera kuti Yezu ali pabodzi na iwo. Mbwenye iwo ansaka pakati pa acibale awo, nee an’gumana.

Iwo abwerera ku Yerusalemu. Pakupita ntsiku zitatu mbakansaka, iwo adzagumana Yezu mu templo. Iye akhali pakati pa apfundzisi mbakabvesera mwadidi, pontho mbakaacita mibvundzo. Apfundzisi  adzumatirwa kakamwe na Yezu kwakuti iwo atoma kuncita mibvundzo. Pontho akhadzuma na matawiro ace. Iwo akhakwanisa kuona kuti Yezu akhadziwa mwadidi Mwambo wa Yahova.

Zuze na Mariya akhadadzudzumika kakamwe. Mariya abvundza: ‘Mwananga, ife tikhakusaka konsene kwene! Ukhali kupi?’ Yezu atawira: ‘Imwe nee mukhadziwa kuti ndikhafunika kukhala n’nyumba ya Babanga?’

Yezu aenda kunyumba kwawo ku Nazareti pabodzi na anyakubalace. Zuze apfundzisa Yezu basa yakupala matabwa. Kodi usanyerezera kuti Yezu akhali mwana wa ntundu wanji? Mukhakula iye, udziwisi wace ukhathimizirika, pontho akhakomeresa Mulungu na anthu.