Yooseefinna Maariyaami, Yesuusi ledo Naazireetete katamira heeˈrino; insara wolu labballunna seennu oosono noonsa. Yooseefi minisi mannira hasiisannore wonshate hanaatsicha ikke loosino; hattono Yihowa daafiranna Seerasi rosiisinonsa. Insa duucha woyite Magano magansidhara xaadu minira woy gambooshshe hadhanno; qoleno Faasiku ayyaana ayirrissara Yerusaalame hadhanno.

Yesuusi 12 dirihu heeˈre minisi manni ledo Yerusaalame haˈrino. Hatte yannara katamu giddo Faasiku ayyaana ayirrisara dayinohu lowo manni no. Gedensaanni, Yooseefinna Maariyaami katamunni fule qaensa higara fuli; insara Yesuusi mannu mereero karsame ledonsa haˈranni nooha lawinonsa. Ikkollana insa Yesuusi fiixinsa ledo nooha laweennansa laˈanno woyite isi dino.

Yooseefinna Maariyaami galagale Yerusaalame hige sase barra woˈma Yesuusa hasanni keeshshi. Hakkunni gedensaanni insa, qullaawu minira haˈri. Insa maranno woyite Yesuusi rosiisaanote mereero ofolle, coyidhannore seekke macciishshanninna insa xaˈmo  xaˈmanni no. Rosiisaanono dhagge assidhe iso xaˈmo xaˈmitanni no. Qoleno Yesuusi qolanno dawaro dhagge ikkitinonsa. Insa Yesuusi Yihowa Seera wodanchinota huwattino.

Yooseefinna Maariyaami kayinni lowo geeshsha masino. Maariyaami togo yitu: ‘Beettoˈya, ninke ate hansanni base baala tunqoommo! Ati mamira higitto?’ Yesuusi qole, ‘Anniˈya mine heeˈra hasiissannoeta diaffinoonni?’ yiinsa.

Yesuusi annisinna amasi ledo Naazireete higino. Yooseefi, isi loosannoha hanaatsimmate looso Yesuusira rosiisinosi. Yesuusi wedellichu noo waro hiittooha lawannohe? Yesuusi lophiti, roore hayyicha ikkino; hattono Maganunna mannu albaanni ayirrinye afiˈrino.