SIFUNDVO 72
Jesu Asemusha
Josefa naMariya bebahlala eNazaretha naJesu kanye nalamanye emadvodzana nemadvodzakati abo. Josefa abebata kuze anakekela umndeni wakhe, futsi abewufundzisa ngaJehova kanye neMtsetfo wakhe. Lomndeni bewuya njalo esinagogeni kuze uyokhonta Jehova futsi kanye ngemnyaka bewuya eJerusalema uyogubha liPhasika.
Ngesikhatsi Jesu aneminyaka lengu-12 budzala, wahamba nemndeni wakubo baya eJerusalema njengobe bebahlale benta. Lelidolobha beligcwele bantfu lebebete kutogubha leliPhasika. Ngemva kwaloko, boJosefa naMariya bahamba babuyela ekhaya, bacabanga kutsi Jesu ukhona kulesicumbi. Kodvwa batsi nabamfuna etihlotjeni tabo bangamtfoli.
Babuyela eJerusalema, futsi kwaphela emalanga lamatsatfu bamfuna. Babese baya ethempelini. Nabefika batfola Jesu ahleti nebafundzisi, abalalele futsi ababuta nemibuto. Jesu bekabamangalisa labafundzisi baze bambuta nemibuto. Beyibamangalisa nendlela labaphendvula ngayo. Bebabona kutsi uyawati uMtsetfo waJehova.
BoJosefa naMariya bebakhatsateke kakhulu. Mariya watsi kuJesu: ‘Bewusolo ukuphi? Sesikufune yonkhe indzawo.’ Jesu watsi: ‘Beningati yini kutsi kufanele ngibe sendlini yaBabe?’
Jesu wahamba nebatali bakhe babuyela eNazaretha. Josefa wafundzisa Jesu kubata. Ucabanga kutsi Jesu abengumuntfu lonjani ngesikhatsi asemusha? Njengobe akhula, Jesu wahlakanipha kakhulu futsi watsandvwa nguNkulunkulu kanye nebantfu.
“Awu Nkulunkulu wami, kuyangijabulisa kwenta intsandvo yakho, umtsetfo wakho usenhlitiyweni yami.”—Tihlabelelo 40:8
Lokunye Longatsandza Kukuhlola
FUNDZISA BANTFWANA BAKHO
Jesu Bekahlale Alalela
Ngalesinye sikhatsi kungase kube metima kulalela batali bakho. Fundza kutsi sibonelo saJesu singakusita njani.
LINGISA KUKHOLWA KWABO
Josefa—Wawuvekela Umndeni Wakhe, Wawondla, Waphikelela
Josefa wawuvikela ngatiphi tindlela umndeni wakhe? Kungani atsatsa Mariya naJesu bay eGibhithe?
