Yusuf dingangi Maria mětẹ̌tanạ su Nazaret dingangi Yesus lai manga anạ i sire wal᷊inẹ. Yusuf nakoạ basẹ̌ u kalu gunang měhiking kěluargane. I sie lai něněntiro kěluargane soal i Yehuwa dingangu Hukung’E. Keluarga ene marading měngibadah, kụ sabang taung i sire makoạ sarang Yerusalem gunang tumol᷊e Paskah.

Su tempong umuri Yesus 12 su taunge, kěluargane nakoạ sarang Yerusalem kere wiasa kẹ̌koateng i sire. Soa ene sěbạe marame ual᷊ingu lawọ taumata diměnta gunang tumol᷊e Paskah. Su apang perayaan Paskah seng nasue, i Yusuf dingangi Maria napul᷊ẹ. I sire nẹ̌pikirẹ̌ i Yesus ene su rombongan i sire. Katewe, su tempong i sire nědeạ si sie, i sie tawe dịe.

Hakị u ene, i rẹ̌dua saụ nẹ̌bal᷊ị sarang Yerusalem, kụ karěngụe tělu ěllo i sire mědẹ̌deạ si Yesus. Samurine, i sire nakoạ sarang bait kụ nakaěbạ si Yesus měbẹ̌bisara dingangu manga guru. I sie dụdaringihẹ̌ mapia-pia kụ měkẹ̌kiwal᷊o mal᷊awọ si sire. Manga guru ene sěbạe naherang kụ i sire lai měkẹ̌kiwal᷊o si sie. Su tempong  nakaringihẹ̌ sasimbahi Yesus, i sire naherang ual᷊ingu i Yesus nakaěna Hukung i Yehuwa.

Yusuf dingangi Maria sěbạe giměnggang. Maria nẹ̌bera, ’Opo, i kami mědẹ̌deạ si kau su kěbị tampạ. I kau nakoạ saranga? Yesus simimbahẹ̌, ’Bal᷊inẹbe i Mamạ dingangi Papạ masingkạ iạ harusẹ̌ ene su wal᷊eng i Amangku?’

Bọu ene, i Yesus napul᷊ẹ dingangu matimade sarang Nasaret. Yusuf něněntiro si Yesus tadeạu makoạ basẹ̌ u kalu. Tumuhụ si kau, su tempong i Yesus bědang kadodọ, i sie kai anạ kerea? Su tempong i Yesus kakạguwạe, i sie nakoạ limembong matahuěna dingangu sauneng kẹ̌kěndagengu Mawu dingangu taumata.