Nipetrake ta Nazareta ao ty Josefa naho i Maria vaho i Jesosy naho o zai’e reo. Nandrafitse ty Josefa mba hamelomagne ty keleia’e. Nampianatse ty keleia’e miomba i Jehovah naho ty Lalà’e ka reke. Nivavake tsy tapake tamy ty Synagoga tao ka iareo sady nankalaza Pasake ta Jerosalema agne isan-taogne.

Naho fa 12 taogne ty Jesosy, le nandeha mba Jerosalema mbeo iareo keleian-draike, fa izay ty nahazatse iareo. Ndaty maro ty niavy agne mba hankalaza Pasake. Naho fa noly ty Josefa naho i Maria, le nieretseretse tie niharo lia amo o longo’e reo avao ty Jesosy. Ie naho fa nipay aze mbeo iareo, le tsy tao ty Jesosy.

Niheregne mba Jerosalema mbeo indraike iareo. Telo andro nipay i Jesosy avao iareo faie tsy nahatrea aze. Nandeha tamy i tempolỳ ao amy izay iareo tamy ty fara’e. Trea iareo nipetrake tagnivo i mpagnanatse rey teo ty Jesosy nitsanogne soa sady nagnontane. Tondregne tamy i Jesosy i mpagnanatse rey, le nagnontane aze.  Nahagaga iareo ty toin-dreha i Jesosy naho ty fahafantara’e ty Lalà i Jehovah.

Nisahiragne ty Josefa naho i Maria ty nipay i Jesosy. Hoe ty Maria tama’e: ‘Sahiragne ty pay azo mbaombao zahay anake! Taia avao i reheo?’ Hoe ty Jesosy: ‘Tsy fanta’areo vao tie tsy maintsy ho an-tragnon-dRaeko ato raho?’

Nandeha noly ta Nazareta agne niarake tamy iareo amy izay ty Jesosy. Nampianare i Josefa nandrafitse reke. Ajaja manao akore ty fahafantara’o i Jesosy? Nisoa laza taman’Andrianagnahare naho tamo o ndatio ty Jesosy naho fa nibey, satria nitombo ty fahendrea’e.