Yɔsɛfu la Mariya wakadjasɛka la Nazarɛtɛ vɔ la Yeso la anawɔ akina w’apami ndo wa wamato. Yɔsɛfu akasukɛka nkumbo kande lo nkamba oko otshudi w’abaya ndo nde akawaetshaka akambo wendana la Jehowa ndo Ɛlɛmbɛ ande. Nkumbo kande kakatshɔka mbala la mbala lo shinangɔnga dia tɔtɛmɔla ndo la Jɛrusalɛma lo Elekanelo ɔnɔnyi tshɛ.

Lam’aki Yeso l’ɛnɔnyi 12, nkumbo kande kakande lɔkɛndɔ l’otale otsha la Jɛrusalɛma oko waki mbekelo kawɔ. Osomba wakalolanɛ l’anto wakaye dia ndjosala fɛtɛ k’Elekanelo. L’ɔkɔngɔ wa fɛtɛ, Yɔsɛfu la Mariya wakatatɛ minda lɔkɛndɔ la nkalola wafɔnya dia Yeso ekɔ lo tasambe l’anto akina. Koko lam’akawatoyanga le ewotɔ awɔ, vɔ kombotana.

Vɔ wakakalola la Jɛrusalɛma, wakasale nshi shato dia nyanga ɔnawɔ. L’ekomelo, vɔ wakatshu lo tɛmpɛlɔ. Lɛkɔ vɔ wakatane Yeso odjashi l’atei w’embetsha awahokamɛ la yambalo tshɛ ndo awaoka ambola w’amɛna efula. Embetsha  wakambe efula lo kɛnɛ kendana la Yeso ko vɔ wakatatɛ mbooka ambola. Ndo ekadimwelo ande wakawaambiyaka efula. Vɔ wakakoke mɛna dia nde shihodiaka Ɛlɛmbɛ wa Jehowa.

Yɔsɛfu la Mariya wakakiyana efula. Mariya akate ate: ‘Ɔnami, tambokoyanga ahole tshɛ! Lende aakiyɛ?’ Yeso akate ate: ‘Onde nyu hanyeye dia dimi pombaka tanema lanɛ lo luudu la Papa?’

Yeso akatshu la ambutshi ande la Nazarɛtɛ. Yɔsɛfu aketsha Yeso olimu w’otshudi w’abaya. Afɔnyayɛ woho akɔna w’onto waki Yeso etena kakinde eke dikɛnda? Etena kakandayolaka, Yeso akahame lo lomba ndo akahomɔ lokolo l’ɔlɔlɔ la ntondo ka Nzambi ndo k’anto.