Josefa aMariya bakali kukkala kuNazareta amwi aJesu abana babo basimbi abalombe. Kuti asanine mpuli yakwe, Josefa wakali mubezi alimwi wakayiisya mpuli yakwe Milawu yaJehova. Chiindi choonse, mpuli yakwe yakali kwiinka kuchikombelo kuyookomba alimwi yakali kwiinka kuJerusalemu munyaka amunyaka kuti bakasekelele Pasika.

Jesu naakaba minyaka iili 12, bamumpuli yakwe bakabamba lweendo lwakuya kuJerusalemu mbuli lubbe. Kwakali bantu biingi kuJerusalemu bakali kuzida kuzoosekelela Pasika. Nilyakamana, Josefa aMariya bakabweeda kulimbabo alimwi bakali kubonaanga Jesu ulimubeenzinyina. Pesi teebakamujana pe chiindi nibakamulanga munzubo zyabo.

Bakabweeda kuJerusalemu alimwi bakamuyanduula kwamazuba atatu. Kumamanino bakaya kutempele. Bakajana Jesu kakkede akati kabayiisi kalikubaswiilizya akubabuzya mibuzyo. Bayiisi  bakamugamba, mpawo bakasanguna kumubuzya mibuzyo. Nsandulo zyakwe zyakali kubagambya. Bakabona kuti wakaluuzi mulawu waJehova.

Josefa aMariya bakakataazikana loko. Mariya wakati: ‘Mwanaangu, twalikukuyanduula, walikuli?’ Mpawo Jesu wakati: ‘Tamuzi na kuti ndeelede kuba mung’anda yaTaata?’

Jesu wakiinka abazyali bakwe kulimbabo kuNazareta. Josefa wakayiisya Jesu kubeza. Ubonaanga Jesu wakali biyeni kachili mukubusi? Jesu wakakomena mubusongo kayandwa aLeza abantu.