Ja José soka María ti ajyiye bʼa Nazaret soka Jesús soka tuk skeremtik sok yakʼixuk. Ja José aʼtiji jastal kalpintero bʼa smakʼla ja spamilya. Cha sjeʼayi ja spamilya sbʼaja Jyoba soka sLeyi. Ja spamilya kʼajyel wa xwajye ja bʼa sinagoga bʼa stoyjel ja Dyosi sok wajel man Jerusalén spetsanil jabʼil bʼa skʼintajel ja Pascua.

Yajni kechanto 12 jabʼil yiʼoj ja Jesús, stuluweyi ja najat sbʼejyele soka spamilya man Jerusalén, jastalni kʼajyele. Ja chonabʼi bʼutʼelxa ixuk winik bʼa cha wajele skʼintajel ja Pascua. Yajni chʼak ja kʼini, ja José soka María cha stuluweyi ja sbʼejyele bʼa kumxel bʼa snaje sok wa xyalawe ta ja Jesús ti wajum soka tuk spamilya. Pe yajni och sleʼeʼi, mini staʼawe.

Ja yuj cha kumxiye man Jerusalén sok oxe kʼakʼu ekʼyujile slejel ja skeremeʼi. Pe man staʼawe kʼote, tey bʼa templo. Tini ay ja Jesús, ti kulan ekʼ bʼa snalane ja jeʼumaniki, wane smaklajel lek sok wan yajel lekil sjobʼjelik. Ja jeʼumaniki jel cham xyabʼye ja jas wa xyala ja Jesús  sok kʼe yaweyi sjobʼjelik. Jelni x-ochkan spensare yuja sjakʼjelik wa xyaʼa. Snaʼawe kʼinal wani xyabʼ lek stojolil ja sLey ja Jyoba.

Ja José soka María jel chamkʼujol aye. Ja María yala: «Kala al, jleʼawatikonta ekʼ bʼa chikan bʼaʼa. ¿Bʼa ajyiya ekʼa?». Jaxa Jesús sjakʼa: «¿Mi maʼ xa naʼawex tini oj ajyukon bʼa snaj ja jTati?».

Ja Jesús kumxi soka snantat man Nazaret. Ja tiw, ja José sjeʼayi ja Jesús ja aʼtel bʼa kalpintero. Pe ¿jastal maʼ ja Jesús ja yajni keremto? Ja Jesús wanxta kʼiʼel sok mas bibo wan wajel. Ja yuj, ja Dyos soka ixuk winik mastoni jel skʼanawe.