Josep na Maria i stap long Nasaret wantaim Jisas na ol narapela pikinini man na meri bilong ol. Josep i wok olsem kapenta long sapotim famili bilong em, na em i skulim ol long Jehova na Lo bilong em. Olgeta taim famili bilong ol i save go long sinagog bilong lotu, na long olgeta yia ol i go long Jerusalem long bung bilong Pasova.

Taim Jisas i gat 12-pela krismas, famili bilong em i wokabaut longpela rot long go long Jerusalem olsem ol i save mekim. Dispela taun i pulap long planti manmeri husat i kam long bung bilong Pasova. Bihain, Josep na Maria i kirap long wokabaut i go bek long ples, ol i ting Jisas i kam wantaim ol. Tasol taim ol i painim em namel long ol wanblut bilong ol, ol i no inap lukim em.

Ol i go bek long Jerusalem, na inap 3-pela de, ol i wok long painim pikinini bilong ol. Na nau, ol i go long tempel. Long dispela hap Jisas i stap, em i sindaun namel long ol tisa, em i putim gut  yau na givim ol gutpela askim. Ol tisa i amamas tru long Jisas na kirap long givim ol askim long em. Na ol i kirap nogut long ol bekim bilong em. Ol i luksave olsem em i kliagut long Lo Bilong Jehova.

Josep na Maria i bin wari tru. Maria i tok: ‘Pikinini, mitupela i bin painim yu long olgeta hap! Yu stap we?’ Jisas i tok: ‘Yutupela i no save olsem mi mas stap long haus bilong Papa bilong mi?’

Jisas i go wantaim papamama bilong em long Nasaret. Josep i skulim Jisas long wok kapenta. Taim Jisas i liklik, yu ting em i wanem kain mangi? Taim Jisas i kamap bikpela, savetingting bilong em i go bikpela na God na ol man i amamas long em.