Yusufu na Malyamu baikaraga omu Nazalesi na Yesu hamu n’abaana baabo abandi aboojo n’abaisiki. Yusufu yakoraga nk’omubaizi kusobora kurolerra ab’omu ka ye, kandi yabegesaga hali Yahwe hamu n’Ebiragiro bye. Ab’eka ye boona bagendaga omu isorrokaniro kuramya obutosa kandi bagendaga na Yerusalemu buli mwaka ha Bugenyi bw’Okuhingurwaho.

Yesu obwakaba aine emyaka 12, Yusufu akatwara eka ye Yerusalemu nk’oku bakoraga buli mwaka. Orubuga rwali rwijwiremu abantu baingi, abaali baizire kujaguza Obugenyi bw’Okuhingurwaho. Obu bamazire, Yusufu na Malyamu bakaimukya orugendo kugarukayo owabu bo kandi bakaba nibatekereza ngu Yesu akaba aliyo nagendera hamu n’abandi. Baitu obu bamuserwire omu banyabuzaale babo, batamurole.

Bakagaruka Yerusalemu, kandi bamara ebiro bisatu nibamuserra. Hanyuma, bakagenda n’okuserra omu Yekaru. Bakasanga Yesu aikalire hagati y’abegesa, nahulirriza kandi nabakaguza. Abegesa  bakahunirra muno habw’okwetegereza kwe, batandika kumukaguza ebikaguzo. Kandi bakahunirra muno habw’omulingo y’abagarukiremu habwokuba bakakyetegereza ngu akaba amanyire Ebiragiro bya Yahwe.

Yusufu na Malyamu baali beralikiriire muno. Malyamu akamugambira ati: ‘Mwana wange, twikaire nitukuserra! Oikaire nkaha?’ Yesu akamugarukamu ati: ‘Obaire otakimanyire ngu nsemeriire kuba omu nju ya Ise nyowe?’

Yesu akagaruka Nazalesi n’abazaire be. Yusufu akegesa Yesu omulimo gw’okubaija. Notekereza Yesu akaba ali musigazi wa mulingo ki? Nk’oku Yesu yayeyongire kukura nukwo n’okwetegereza kwe kwayeyongiire kandi akasiimwa Ruhanga hamu n’abantu.