Иосиф, Мария ажы-төлү-биле Назаретке чурттап турган. Иосиф бызаңчы болгаш, амыдыралга акшаны ынчаар ажылдап ап чораан. Ол ажы-төлүнге Иегованың болгаш ооң Хоойлузунуң дугайында чугаалап чораан. Олар синагогаже барып, а чылда чаңгыс катап Иерусалимче Хосталыышкын байырлалынче баар турган.

Иисус 12 харлыг турда, олар өөренген аайы-биле Иерусалимче ырак орукче үнүпкен. Хосталыышкын байырлалынче дыка хөй улус кээр турган. Байырлал соонда Иосиф биле Мария Иисусту төрелдери-биле кады деп бодааш, бажыңынче чорупканнар. Ынчалза-даа ол оларның аразында чок болган.

Олар Иерусалимче катап чеде бергеш, Иисусту үш хонук дилээш, Бурганның өргээзинден тып алган. Ол башкыларны кичээнгейлиг дыңнап, нарын айтырыглар салып олурган. Башкылар ону угаанныг деп эскерип кааш, боттары айтырыглар салып эгелээн. Иисустуң  харыылары оларны кайгадып турган. Бурганның Хоойлузун ол дыка эки билир деп, олар көрген.

Иосиф биле Мария Иисусту дилеп турган үезинде аажок муңгарап, девидеп турганнар. Мария Иисусту тып алгаш: «Оглум, бис сени дилеп шаг болдувус! Каяа турдуң?» — дээн. Иисус ада-иезинге: «Адамның өргээзинге кээр ужурлуумну билбээниңер ол бе?» — деп харыылаан.

Оон Иисус ада-иези-биле Назаретче чорупкан. Иосиф ону бызаңчы ажылга өөредип турган. Иисус бичиизинде кандыг чораан? Ол өзүп-мандып, мерген угаанныг апарып, Бурганның-даа, өске улустуң-даа сеткилинге кирер турган.