Yosefe ni Maria yaakhala oNazarethi ni Yesu. Awosa yaahikhalana anamwane akina axilopwana ni axithiyana. Yosefe aanikhaliherya emusi awe ovaraka muteko wa okalapintero, ni aaniwiixuttiha anaawe itthu sinceene voohimya sa Yehova ni ikano sawe. Emusi ele yaahikhalana yoolema ya orowa osinagoga wira yamukokhorele Yehova, nave khula eyaakha yaanirowa oYerusalemu omwiira Paasikha.

Vaavo Yesu aarina awe iyaakha 12, emusi awe yaaheetta mukwaha woorakama erowaka oYerusalemu, sintoko yaalimalenle aya. Epooma ele yaahisareya atthu yaarwenle omwiira Paasikha. Omalakaru Paasikha, Yosefe ni Maria yaahihokolowela elapo aya, nto yuupuwela wira Yesu aari ni atthu akina. Masi yaahimphavela Yesu ni yaahaakoha amusi aya, masi khiyamphwannye.

Yosefe ni Maria yaahitthikela oYerusalemu, ni yaahiviriha mahiku mararu, emphavelaka mwanaya. Wanikisa waya yaahirowa otemplo. Yaahimphwanya Yesu okilanthe ene eriyari ya awiixuttihi,  aawiriyanaka ni aakohaka itthu sooreera. Awiixuttihi ale yaahitikinihiwa vanceene ni Yesu, nto yaahipacerya omukoha itthu sinceene. Nave yaahitikinihiwa okhala wira Yesu aaniwaakhula oratteene. Awo yaahiweha wira Yesu anisuwela saana Nlamulo na Yehova.

Yosefe ni Maria yaahixanka vanceene. Vano Maria aahimukoha Yesu wira: ‘Hiyo khanireere woophavelani! Mwaari woowi?’ Yesu aahiwaakhula so: ‘Khimwaasuwela wira kihaana okhala mpaani mwa Atithi aka?’

Yesu aahihokolowela oNazarethi ni anamuyari awe. Yosefe aahimwiixuttiha Yesu ekalapintero. Munoonela sai, Yesu aari mmiravo a mukhalelo xeeni? Vaavo Yesu annuwa awe aanikhalana miruku, nto Muluku ni atthu yaanisiveliwa ni owo.