Hira Jose ngan Maria naukoy ha Nasaret upod hi Jesus ngan an iba pa nira nga anak. Ginsusuportaran ni Jose an iya pamilya pinaagi ha pagpanday, ngan gintututdoan niya hira mahitungod kan Jehova ngan ha Iya Balaud. An ira pamilya regular nga nasingba ha sinagoga ngan napakadto ha Jerusalem kada tuig para ha Paskua.

Han 12 anyos hi Jesus, nagbiyahe an ira pamilya ngadto ha Jerusalem sugad han ira nahiaraan. Damu hinduro nga tawo an kumadto ha syudad basi magselebrar han Paskua. Katapos han Paskua, nagbiyahe na hira Jose ngan Maria tipauli. Kahuna nira nga kaupod hi Jesus ha ira grupo. Pero han ginpamiling nira hiya ha ira mga paryente, waray nira makita hi Jesus.

Binalik hira ha Jerusalem, ngan ginpinamiling hi Jesus ha sulod hin tulo ka adlaw. Ha urhi, kinadto hira ha templo. Didto, nakita nira hi Jesus nga nalingkod ha butnga han mga magturutdo. Namamati gud hiya ha ira ngan nagbabangon hin mag-opay nga pakiana. Bumilib gud kan Jesus an mga magturutdo salit nagpapakiana liwat hira ha iya. Ngan nahipausa hira  ha iya mga baton. Nakita nira nga nasasabtan ni Jesus an Balaud ni Jehova.

Nabaraka gud hira Jose ngan Maria. Hi Maria nagsiring: ‘Anak, ginpinamiling ka gud namon! Nakain ka?’ Hi Jesus binaton: ‘Diri ba kamo maaram nga kinahanglan aanhi ako ha balay han akon Amay?’

Inuli hi Jesus ha Nasaret upod han iya mga kag-anak. Gintutdoan hiya ni Jose pagpanday. Ano daw la nga klase hin batan-on hi Jesus? Samtang nagdadaku hiya, nadugangan an iya kinaadman ngan nalipay gud ha iya an Dios ngan an mga tawo.