Yosefe ni Maliya ŵatamaga ku Nasaleti ni Yesu pampepe ni ŵanace ŵawo ŵane ŵacalume ni ŵacakongwe. Kuti akombole kulisamalila liŵasa lyakwe, Yosefe ŵakamulaga masengo ga ukalipentala. Jwalakwe ŵalijiganyisye liŵasa lyakwe yakwamba Yehofa nambosoni Cilamusi cakwe. Liŵasali lyakwete cisyoŵe cakwawula kumalo gakulambilila soni ku Yelusalemu kukutenda Cindimba ca Pasaka caka cilicose.

Yesu ali akwete yaka 12, acinangolo ŵakwe ŵalinganyisye yakwawula ku Yelusalemu mpela muŵatendelaga caka cilicose. Mumsindamu mwagumbele ŵandu ŵajinji ŵiŵayice kukutenda cindimba ca Pasaka. Cindimbaci cili cimasile, Yosefe ni Maliya ŵawutandite ulendo wakuwujila kumangwawo, aciganisyaga kuti Yesu ali yimpepe mu likugalyo. Nambo paŵayiweni kuti nganaŵa yalumo, ŵatandite kumsosasosa mwa ŵacibale ŵaŵaliji mu likugalyo, nambo nganampata.

Ŵawujilesoni ku Yelusalemu ni kwa masiku gatatu ŵaliji kumsosasosa mwanagwawojo. Pambesi pakwe ŵapite ku malo gakulambilila. Kweleko Yesu ŵaliji pasikati pa ŵakwiganya, ali mkwapikanila mwalung’wanu soni  kwawusya yiwusyo. Ŵakwiganyawo ŵatesile lung’wanu ni lunda lwa Yesu ni ŵatandite kum’wusya yiwusyo, mwati ŵasimonjile mnope ni kajanje kakwe. Jemanjajo ŵayiweni kuti jwamanyililaga Cilamusi ca Yehofa.

Yosefe ni Maliya ŵaliji ŵakudandawula. Ali amsimene Yesu, Maliya ŵatite, ‘Mwanangu, tuŵele tuli mkumsosasosa kulikose. Ana mwaliji kwapi?’ Yesu ŵajanjile kuti, ‘Ana ngakumanyilila kuti ngusosekwa kuŵa m’nyumba ja Atati ŵangu?’

Kaneko, Yesu ŵalongene ni acinangologwe ulendo wa ku Nasaleti. Yosefe ŵamjiganyisye Yesu masengo ga ukalipentala. Ana mkuganisya kuti Yesu paŵaliji mcanda ŵaliji mundu jwamtuli? Paŵakulaga, Yesu ŵajendelecele kuŵa jwalunda, soni Mlungu ni ŵandu ŵajendelecele kumnonyela.