José, María, Jesús, bey xan uláakʼ u paalaloʼobeʼ tiʼ kajaʼanoʼob kaʼach Nazareteʼ. Joseeʼ ku beetik u carpinteroil utiaʼal u tsʼáaik baʼax kʼaʼabéet tiʼ u familia. Tsʼoʼoleʼ ku kaʼansik xan tiʼob bix Jéeoba yéetel baʼax ku yaʼalik u Ley. Letiʼobeʼ suuk u binoʼob kaʼach teʼ sinagoga utiaʼal u adorartikoʼob Diosoʼ yéetel cada añoeʼ ku binoʼob xan Jerusalén utiaʼal u kʼiinbeskoʼob le Pascuaoʼ.

Le yaan 12 años tiʼ Jesusoʼ, letiʼ yéetel u familiaeʼ binoʼob tu náanach kaajil Jerusalén jeʼex suuk u beetkoʼob cada añoeʼ. Le kaajoʼ chochoʼkil yéetel le máaxoʼob bijaʼanoʼob u kʼiinbesoʼob le Pascuaoʼ. Ka tsʼoʼok le kʼiinbesajoʼ le táan u suut José yéetel María tu yotochoʼobeʼ tu tukloʼob tiaʼan Jesús tu yiknal u láakʼtsiloʼobeʼ. Chéen baʼaleʼ ka joʼopʼ u kaxtikoʼob ichil le máaxoʼob ku suutoʼoboʼ, minaʼaniʼ.

Letiʼob túuneʼ suunajoʼob Jerusalén. Máan óoxpʼéel kʼiin táan u kaxtikoʼob u hijo, tiʼ tu yiloʼob teʼ templooʼ. Jesuseʼ kulukbal kaʼach chúumuk tiʼ le j-kaʼansajoʼoboʼ táan u chʼenxikintikoʼob yéetel táan u  beetik kʼáatchiʼ tiʼob. Le j-kaʼansajoʼoboʼ jach jaʼakʼ u yóoloʼob yoʼolal le baʼaxoʼob ku yaʼalik Jesusoʼ bey xan yoʼolal bix u núukik le kʼáatchiʼob tu beetoʼob tiʼoʼ. Letiʼobeʼ tu tsʼáajoʼob cuenta Jesuseʼ jach maʼalob u naʼatik u Ley Jéeoba.

José yéetel Maríaeʼ jach chiʼichnakchajaʼanoʼob. Le oʼolal Maríaeʼ tu yaʼalaj: ‹Hijo, táan k-sen máan kaxtech. Táan k-sen tuklik tuʼux tsʼoʼokech›. Jesuseʼ tu yaʼalajtiʼ: ‹¿Maʼ wa a wojleʼex tu yotoch in Taata kʼaʼabéet in wantaliʼ?›.

Jesuseʼ suunaj Nazaret yéetel u papaʼob. Teʼeloʼ Joseeʼ tu kaʼansaj tiʼ Jesús u beet u carpinteroil. A tuklikeʼ, ¿bix kaʼach u modos Jesús tu táankelmil? Letiʼeʼ seguernaj u sen yantal u naʼat, u nojochtal bey xan u lúubul utsil tiʼ Dios yéetel tiʼ le máakoʼoboʼ.