Yosefa na Maria aaraka na Yesu gbiati gu kura awiriyo nga akumba na adee Nazareta yo. Yosefa aangerafuo gako aborokporo na sunge kpengua, na ko anaayugopai fuyo tipa Yekova na gako aNdiko. Gako aborokporo anaandu dedede ku bambutiria yo tipa ka kpara fu Mbori na kini ndu na agarã dũ ku Yerusarema yo tipa Pumbo Susiri.

Ho garã Yesu ada ni nga 12, gako aborokporo andu gbanga nunguro ku Yerusarema yo. Gu gbata re aima hi be agu aboro naaye tipa Pumbo Susiri. Fuo bete aˈuru kusa, Yosefa na Maria atona ka karagatiyo ku kporo yo na i aaberãha nga Yesu kina dagba badona aboro. Ono ho i angere ni tipa ko dagba agumeyo, i aabingo ko te.

I akaragatiyo ku Yerusarema yo, na i ki gbata ko tipa arame biata zanga i biko. Niyangaraha, i andu ku yekaru yo. I ki bi Yesu yo ko nasungu dagba abayugupai, kaa degatuko kuti  agu apai i aagumbaha na kini sasana yo na asanahe. Ngba agu abayugupai re aima zera be Yesu i ki tona ka sanako na asanahe. Kina iriwopai naati tiyo be gako akaragapai. I abihe nga ko ima ino ga Yekova aNdiko.

Yosefa na Maria aima du na bakere bakabangirise. Maria ki ya: ‘Gude, ani ima gbata ro ni kerehe! Wari mo andu kuho ni?’ Yesu ki ya: ‘Oni ainongo ho te nga mi ima rengba ka du ane rogo ga Buba bambu?’

Yesu akaragatiko na avunguko ku Nazareta yo. Yosefa ki yugu sunge kpengua fuko. Mo nabihe nga gini ngbatunga boro Yesu angia ni ho ko adu ni tooni? Wa Yesu aasona, gako tatamana aakio kina kumbatayo na ko ki ngba bangiri Mbori na aboro a.