José né María, bibanyibu gudx ni góc laa Nazaret né guiráca ximbioxyibu. José bunytzaaybu yac par godudybu dzú né xfamilybu. Láaca bisuidybu xiimbu ni ná Ley xtuny Jehová. Xfamily José guirási ór goyeeyibu lainy sinagoga par bienyibu Dios né guirá íz goyeeyibu Jerusalén par bunyibu lanii ni góc laa Pascua.

Órni Jesús gop 12 íz, xfamilbu goyee Jerusalén ni riaʼan sit, xomod bunyibu guirá íz. Gudx Jerusalén bidzani de buñ dzúcu, par gonyibu lanii xtuny Pascua. Órni bilox laniicu, José né María goyoʼyibu néz bibiguetyibu né bunyibu pensary que Jesús noʼ lad stipnés xfamilyibu. Per órni biyopyibu Jesús lad guirá buñcu, diti bidzelyibu Jesús.

Ór cú bibiguetyibu Jerusalén né gosaayibu tzón govitz biyopyibu Jesús. Órni bidzelyibu Jesús lainy templo, sob Jesús lad guirá mextracu, cacadiagtzaybu né ronybu galrranabdiitz.  Guirá mextracu nigolú bidziguiaʼyibu por guirá ni goniʼ Jesús. Por ngú ma layibu bunyibu galrranabdiitz a Jesús né bidziguiaʼyibu mod cuapy Jesús layibu. Biduidyibu cuent que Jesús bientzaay ni ná Xiley Jehová.

José né María nigolú goyoʼyibu ló galrrasaʼ portín bisacyibu que ma bisnityibu Jesús. María góoch láabu: «Xiingaʼna, ma biyopydo looy guirá lad. ¿Pu goyoʼlo?». Jesús cuapy láabu: «¿Diti nanto que non tzoʼya lidx Bixiosa la?».

José né María bibiguetnéyibu Jesús gudx Nazaret. Lagarycu José bisuidybu Jesús gonytzaay yac. Xpensarylo, ¿ximod góc Jesús dzú ni gócbu mbioxhlas? Jesús goniʼs né gopbu más galnann. Por ngú Dios né buñ bioladx mod góc Jesús.