Jon, wod pa Jekaria ki Elicabet, odoko lanebi i kare ma en odongo. Jehovah otiyo ki Jon me pwonyo dano ni Meciya tye ka bino. Ento me kaka pwonyogi i kacokke nyo i gangigi, Jon otito kwena i tim. Dano gubino kun gia ki i Jerucalem ki Judaya me nongo pwony ki bot Jon. En opwonyogi ni me yomo cwiny Lubanga, myero guwek timo jami maraco. I nge winyo lok pa Jon, dano mapol gungut i kom balgi, ci Jon obatijagi i Kulu Jordan.

Jon onongo kwo kwo ma rwomme lapiny. En onongo ruko bongo ma kiyubo ki yer kinaga kun camo bonyo ki moo kic ma i tim. Dano onongo gitye ki miti madit me ngeyo ngat ma Jon obedo. Kadi wa Luparicayo ki Lucadukayo ma luwaka-ni gubino ka nene. Jon owaco botgi ni: ‘Myero wulok kitwu dok wungut i kom balwu. Pe wutam ni piwu tek tutwal pien wuwaco ni wubedo likwayo pa Abraim. Meno pe te lokke ni wun lutino pa Lubanga.’

Dano mapol gubino bote kun gipenye ni: ‘Ngo ma omyero watim me yomo cwiny Lubanga?’ Jon ogamo ni: ‘Ngat ma tye ki kanyi aryo, opok bot ngat ma pe kwede.’ Ingeyo pingo en owaco kit meno? En onongo mito ni gunge ni me yomo cwiny Lubanga, myero gumar dano.

Jon owaco bot lujog-mucoro ni: ‘Pe wujog makato wel ma kicikowu.’ En owaco bot lumony ni: ‘Pe wugam lim ma giwilowu kwede nyo wulok lok goba.’

 Lulamdog ki Lulevi gubino ka neno Jon ci gupenye ni: ‘In anga? Dano ducu gimito ngeyone.’ Jon ogamo ni: ‘An a dwan ngat ma dange i tim, kun atelo dano bot Jehovah, kit ma lanebi Icaya otito kwede.’

Dano onongo gimaro pwony pa Jon. Jo mapol gubedo ka penye kekengi ka ce Jon aye Meciya. Ento en owaccigi ni: ‘Ngat mo ma tek loyo an tye ka bino. An pe apore me gonyo wa del warre. An abatijawu ki pii, ento en bibatijawu ki cwiny maleng.’