Yôhanes, man munlôm nu Sakaria bo Élisabét, a bi yila mpôdôl ngéda a bi nañ. Yéhôva a bi gwélél Yôhanes inyu niiga litén le Mésia a yé lo. Ndi ilole a niiga ikété mandap ma bibégés, tole ikété bitison, Yôhanes a bé téé likalô i ñoñ. Bôt ba bé lôl i Yérusalem ni mbok Yudéa yosôna inyu emble Yôhanes. A bé niiga bo le, inyu lémél Djob, ba nlama ha bé boñ mam mabe. Kiki ba bé emble Yôhanes, ngandak i tam bibéba gwap. A sôble bo i Lom Yordan.

Niñ Yôhanes i bé tomb bé. A ba haba mbot mahuu ma kamél, bijek gwé, bi ba bakôlô ni wéi bikai. Libak li Yôhanes li bé hélés bôt. Yak bôt ba ngôk kiki lôk Farisai ni lôk Sadukai, ba bi ke i tehe nye. Yôhanes a kal bo le: ‘Ni nlama héñha, ni tam ki maboñok manan mabe. Ni hoñol bañ le ni yé bôt ba tôbôtôbô ndik inyule ni yé bon ba Abraham. Libak li, li nyilha bé bé bon ba Djob.’

Ngandak i bé bat Yôhanes le: ‘Kii di nlama boñ inyu lémél Djob?’ A bé timbhe Lôk Yuda le: ‘Ibale ni gwé bikodi biba, ndi mut wada a bana ngôñ, ni ti nye yada.’ Baa u nyi inyuki a bi kal hala? A bé sômbôl le banigil bé ba yi le, inyu lémél Djob, ba nlama gwés bôt.

Yôhanes a kal bakottas le: ‘Ni ba maliga, ni nibil bañ mut nye ki nye.’ A kal bisônda le: ‘Ni leegege bañ bitek, to bitembee ni pot bañ.’

 Yak biprisi ni Lôk Lévi bi bi bat Yôhanes le: ‘Njee u yé? Bôt bobasôna ba nsômbôl yi.’ Ndi a timbhe bo le: ‘Me yé kiñ i nkwai i ñoñ, i i nkena bôt yak Yéhôva, kiki Yésaya a bi bôk a pot.’

Bôt ba bé gwés i mam Yôhanes a bé niiga bo. Ngandak i bé badba too Yôhanes nyen a yé Mésia. Ndi a kal bo le: ‘Mut wada a nlel me, a yé njel. Ndi me kôli bé me to i hohol mikôô nwé mi bitamb. Me, me nsôble lôñni malép, ndi nye a ga sôble lôñni mbuu mpubi.’