Jean, mone Zacharie ba Élizabeth, a nga su’ulane bo nkuli mejô. Yéhôva a nga belane nye na a ye’ele bôt na Messie a zu. Ve Jean a mbe a kañete’e nkôte si, sa ke besynagogue nge ke bitison. Bôt be mbe be so’o Jérusalem a Juda ase na ba zu vô’ôlô nye. A nga jô be na, nge ba kômbô ve Zambe nlem avak, ba yiane jô’é mbia be mam ba bo. Éyoñ be nga mane wô’ô mejô me Jean, abui e nga jôban abé dap, ane Jean a nga baptizô be e Jourdain.

Jean a nji be a jeñe’e abui mam ényiñ. A mbe a jaé’ biyé be nga kôm a ékôb éjakas, a mbe fe a ja’a bitandak a wôé. Bôt be mbe be veme a Jean. To’o Bepharizien a Besadducéen be nga zu yene nye. Jean a nga jô be na: ‘Mia yiane tyendé mimboone mienan a kôñelane minlem. Te mia buni na jôm é vo’o mia bo fo’o ve amu mia jô na mi ne bone be Abraham. Nalé a nji tinane na mi ne bone be Zambe.’

Abui bôt e nga zu sili Jean na: ‘Jé bi ne bo asu na bi ve Zambe nlem avak?’ A nga yalane Bejuif na: ‘Nge mi bili biyé bibaé, va’ané nzôzoé jia.’ Ye wo yem amu jé a nga jô nalé? A mbe a kômbô’ô liti beyé’é bé na, nge ba kômbô ve Zambe nlem avak, ba yiane nye’e bôt bevok.

Jean a nga jô benyoñe taxe na: ‘Bo’ané zôsôô, te mia wube môte jôm.’ A nga jô bezimbi na: ‘Te mia kañese ébotezel, a te mia laane minsos.’

 Beprêtre a Belévite fe be nga ke nye yen, a sili nye na: ‘Ô ne ne za? Môt ase a kômbô yem za ô né.’ Jean a nga yalane be na: ‘Me ne tyiñe ja yôtane nkôte si, ma ma liti bôt zene Yéhova, fo’o ve aval nkuli mejô Ésaïe a nga jô.’

Bôt be mbe be nye’e mam Jean a mbe a ye’ele’e be. Abui e mbe e buni’i na nnye a ne Messie. Ve a nga jô be na: ‘Môt a dañe ma a zu. Me nji bo môt a yiane tiine nye bikôndé. Me ma baptizô mia a mendim, ve nye’e ki a ye baptizô mia a mbamba nsisim.’