Zakari ni Elizabɛti dencɛ Zan kɔrɔbayara ka na kɛ kira ye. Jehova ye Zan ta a ka mɔgɔw kalan ko Masiya be nana. Nka sanni a ka mɔgɔw kalan batosow wala duguw kɔnɔ, Zan tun be waajuli kɛ kongokolon kɔnɔ. Mɔgɔw tun be bɔ Zeruzalɛmu ani Zude faan bɛɛ la ka na kalan Zan fɛ. A y’u kalan ko n’u b’a fɛ u koo ka diya Ala ye, u ka kan k’u ka kojugukɛ dabila. Mɔgɔ caaman ye Zan lamɛn minkɛ, u nimisara u ka jurumuw la ani Zan y’u batize Zurudɛn baji la.

Zan tun be ɲɛnamaya kɛ cogo nɔgɔman na. A tun be fani min don, o tun dilanna ni ɲɔgɔmɛsi ye ani a tun b’a yɛrɛ balo ni tɔɔn ni lii ye. Mɔgɔw tun b’a fɛ ka Zan lɔn. Fariziɲɛw ni Saduseɲɛw yɛrɛ nana a filɛ. Zan y’a fɔ u ye ko: ‘Aw ka kan ka yɛlɛmani don aw ka kɛwalew la ani ka nimisa. Aw kana a miiri ko aw ɲɔgɔn tɛ yen sabu aw b’a fɔ dɔrɔn ko aw ye Ibrayima deenw ye. O t’a yira ko aw ye Ala deenw ye.’

Mɔgɔ caaman nana Zan ɲininga ko: ‘An ka kan ka mun lo kɛ walisa an koo ka diya Ala ye?’ Zan y’a fɔ Yahutuw ye ko: ‘N’aw be ni fani fila ye, dɔ tɛ min fɛ, aw ye kelen di o tigi ma.’ I b’a lɔn fɛɛn min kama a y’o fɔ wa? A tun b’a fɛ a ka kalandenw k’a lɔn k’u ka kan ka mɔgɔw kanu walisa u koo ka diya Ala ye.

Zan y’a fɔ lanpominɛlaw ye ko: ‘Aw y’aw kɔnɔ gwɛ ani aw kana mɔgɔ nanbara.’ A y’a fɔ sɔrɔdasiw ye ko: ‘Aw kana sɔn ka surafɛn minɛ wala ka ngalon tigɛ.’

 Sarakalasebagaw ni Levitew fana nana Zan ɲininga ko: ‘E ye jɔn ye? Bɛɛ b’a fɛ k’i lɔn.’ Zan ko: ‘I ko Ezayi y’a fɔ cogo min na, mɔgɔ min be pɛrɛnna kongokolon kɔnɔ ka mɔgɔw dɛmɛ k’u magwɛrɛ Jehova la, ne y’o tigi le ye.’

Zan tun be mɔgɔw kalan min na, o tun ka di u ye. Mɔgɔ caaman tun b’u yɛrɛ ɲininga n’ale lo ye Masiya ye. Nka a y’a fɔ u ye ko: ‘Dɔ be nana, o min ka bon ne ye. Ne ka dɔgɔ kojugu k’a ka sanbara juru yɛrɛ foni. Ne be mɔgɔw batize jii la, nka ale bena mɔgɔw batize ni hakili senu lo ye.’