Wo de Johannes, de Sohn vom Sacharja und de Elisabeth, erwachse isch, wird er en Prophet. Jehova schickt ihn zu de Mensche, zum ihne z säge, dass de Messias chunnt. De Johannes lehrt aber nid i de Städt oder i de Synagoge, sondern i de Wildnis. Vil Mensche us Jerusalem und ganz Judäa chömmed, wil si ihm wend zuelose. Er seit ihne, wenn si Jehova wend gfalle, müend si ufhöre, Böses z mache. Vil bereued ihri Sünde, das heisst si gebed ihri Fehler zue, und de Johannes tauft si im Jordan.

De Johannes lebt ganz eifach. Sini Chleider sind us Kamelhaar und er isst Heugümper und wilde Honig. Das macht d Lüt gwundrig, was de Johannes für eine isch. Sogar di stolze Pharisäer und Sadduzäer chömmed cho luege. De Johannes seit ihne: «Ihr müend bereue und euch ändere. Ihr müend nid s Gfühl ha, dass ihr öppis Bsundrigs sind, nume wil ihr säged, dass eue Vater de Abraham isch. Das heisst no lang nid, dass ihr au Chind vo Gott sind.»

Vil Jude chömmed zum Johannes und fraged: «Was müend mir mache, dass Gott Freud het a üs?» Er git zur Antwort: «Wenn ihr zwei Chleider hend, denn gebed eis dem wiiter, wo keis het.» Was meinsch, wiso seit das de Johannes? Er wett, dass sini Jünger verstöhnd, wenn si Gott wend gfalle, müend si d Mensche gern ha.

Zu de Stüürinehmer seit de Johannes: «Sind ehrlich und verlanged nid meh als abgmacht.» De Soldate seit er: «Lüged nid und lönd euch nid mit Geld la erpresse.»

Au d Prieschter und d Levite chömmed zum Johannes. Si fraged: «Wer bisch du? Das wend alli andere au wüsse.» Er git zur Antwort: «Ich bin e Stimm i de Wildnis, wo d Mensche zu Jehova tuet füehre, genau so wies de Prophet Jesaja vorusgseit het.»

De Mensche gfallt das, wo de Johannes lehrt. Vil fraged sich, öb er echt de Messias isch. Er seit aber: «Es chunnt öpper, wo vil grösser isch als ich. Ich bin nid emal guet gnueg, zum ihm d Sandale vo de Füess loszbinde. Ich taufe mit Wasser, aber er wird mit heiligem Geischt taufe.»