Juan haʼe vaʼekue Zacarías ha Elisabet família. Jehová omoĩ vaʼekue Juánpe profétaramo ha ojevale hese omombeʼu hag̃ua la héntepe pe Mesías og̃uahẽmbotaitemaha. Péro Juan ndopredikái vaʼekue umi siudaháre ni umi sinagógape, síno pe desiértope. Heta hénte oikóva Jerusalén ha Judéape ohómi vaʼekue ohendu hag̃ua Juánpe. Haʼe heʼi vaʼekue umi héntepe oheja vaʼerãha umi mbaʼe vai ojapóva oipotáramo Jehová oguerohory chupekuéra. Upéicha rupi heta hénte oñarrepenti hembiapo vaikuére ha Juan ovautisa chupekuéra pe rrío Jordánpe.

Juan ningo oiko vaʼekue sensillomínte, omonde umi ao ojejapóva kaméllo raguekuégui ha hoʼu tuku ha eirete. Umi hénte oikuaase vaʼekue chupe ha umi fariséo ha saduséo oñemombaʼeguasuetéva jepe oho vaʼekue hendápe. Juan heʼi umi fariséo ha saduséope: “Peñarrepenti ha pekambia vaʼerã. Peẽ ningo pejekree ha peje peẽ haʼeha Abrahán raʼy, péro upéva ndeʼiséi peẽ haʼeha Ñandejára raʼy”.

Umi hénte oporandúmi vaʼerã Juánpe: “¿Mbaʼe piko rojapo vaʼerã Ñandejára oreguerohory hag̃ua?”. Ha Juan heʼi chupekuéra: “Perekóramo mokõi ao, pemeʼẽ peteĩ pe oikotevẽvape”. ¿Reikuaápa mbaʼérepa Juan heʼi chupekuéra upéva? Pórke haʼe oipota umi hénte ohechakuaa ohayhu vaʼerãha hapichakuérape ikatu hag̃uáicha Ñandejára oguerohory chupekuéra.

Juan heʼi vaʼekue umi impuésto kovrahápe: “Peneonrrádo vaʼerã ha ani pehode avavépe”. Ha umi soldádope heʼi: “Ani pendejapu ni pekoimea pende rapichápe”.

 Umi saserdóte ha levíta oho vaʼekue avei Juan rendápe ha heʼi chupe: “Entéronte roikuaase mávapa nde”. Juan heʼi chupekuéra: “Che ningo pe oñeʼẽva pe desiértore ogia hag̃ua umi héntepe oñemoag̃ui hag̃ua Jehováre, proféta Isaías heʼi haguéicha”.

Umi héntepe ningo ogustaiterei vaʼekue umi mbaʼe Juan omboʼéva ha oikuaase voi hikuái noiméipa haʼe hína pe Mesías. Upévare Juan heʼi umi héntepe: “Peteĩ tuichavéva chehegui og̃uahẽmbotaite hína ha che namereséi ni isandália sã ajora chupe. Che povautisa ýpe, péro haʼe pendevautisáta espíritu sántope”.