NUPINPLỌN 73
Johanu Jla Aliho lọ Do
Whenue Johanu, yèdọ visunnu Zekalia po Elizabẹti po tọn whẹ́n, e lẹzun yẹwhegán de. Jehovah yí Johanu zan nado plọn mẹlẹ dọ Mẹsia lọ ko ja. Amọ́, kakati nado plọnnumẹ to sinagọgu lẹ mẹ kavi to tòdaho lẹ mẹ, Johanu nọ dọyẹwheho to danfafa ji. Gbẹtọ lẹ nọ wá sọn Jelusalẹm podọ sọn lẹdo Jude tọn lẹpo mẹ nado plọnnu sọn Johanu dè. E nọ plọn yé dọ eyin yé jlo na hẹn homẹ Jiwheyẹwhe tọn hùn, yé dona jo nuylankan wiwà do. To todidoai na Johanu godo, mẹsusu lẹnvọjọ sọn ylando yetọn lẹ mẹ bọ Johanu baptizi yé to Tọ̀sisa Jọdani mẹ.
Johanu nọ zan gbẹzan he bọawu. Avọ̀ he yè yí ofún kanklosọ́ tọn do basi wẹ e nọ do bo nọ dù owẹ̀n lẹ po owín akú po. Mẹlẹ nọ jlo na yọ́n omẹ nankọ he Johanu yin. Falesi po Sadusi goyitọ lẹ po tlẹ wá e dè. Johanu dọna yé dọmọ: ‘Mì dona diọ aliho mìtọn lẹ bo lẹnvọjọ. Mì ma lẹndọ emi gbọnvona mẹhe pò lẹ na mì nọ dọ dọ emi yin ovi Ablaham tọn wutu poun blo. Enẹ ma dohia dọ mì yin ovi Jiwheyẹwhe tọn lẹ.’
Mẹsusu wẹ nọ wá Johanu dè bo nọ kanse e dọ: ‘Etẹwẹ mí dona wà nado hẹn homẹ Jiwheyẹwhe tọn hùn?’ Johanu dọna Juvi lẹ dọmọ: ‘Eyin a tindo awù awe, na dopo mẹhe tindo hudo etọn.’ Be a yọ́n nuhewutu e do dọ mọ ya? E jlo dọ devi etọn lẹ ni yọnẹn dọ eyin yé jlo na hẹn homẹ Jiwheyẹwhe tọn hùn, yé dona yiwanna mẹlẹ.
Johanu dọna tòkuẹ-ṣinyantọ lẹ dọ: ‘Mì yin nugbonọ bo ma nọ tafumẹ blo.’ E dọna awhànfuntọ lẹ dọ: ‘Mì ma nọ yí alọgodo-kuẹ kavi dolalo blo.’
Yẹwhenọ lẹ po Levinu lẹ lọsu po wá Johanu dè bo kanse e dọ: ‘Mẹnu wẹ hiẹ? Mẹlẹpo wẹ jlo na yọnẹn.’ Johanu dọmọ: ‘Yẹn wẹ mẹlọ he to awhádo to danfafa ji, bo to anadena mẹlẹ yì Jehovah dè, kẹdẹdile Isaia ko dọ dọdai etọn do.’
Gbẹtọ lẹ yiwanna nuhe Johanu to pinplọn yé. Mẹsusu wẹ nọ kanse yede eyin Johanu wẹ Mẹsia lọ. Amọ́, e dọna yé dọmọ: ‘Mẹhe klohugan mi taun de ja. Yẹn ma tlẹ jẹ nado tún afọpakàn etọn lẹ. Osin wẹ yẹn nọ yí do baptizi, ṣigba gbigbọ wiwe wẹ uwọ na yí do baptizi.’
“Dawe ehe wá taidi kunnudetọ de, yèdọ nado dekunnu gando hinhọ́n lọ go, na gbẹtọ wunmẹ lẹpo nido sọgan tindo yise gbọn ewọ gblamẹ.”—Johanu 1:7
A Gán Sọ Pọ́n Hosọ Ehelẹ
JESU—ALIHO LỌ, NUGBO LỌ PO OGBẸ̀ PO
Mẹhe Na Jla Aliho lọ Do Yin Jiji
Tlolo he onù Zekalia tọn hùn to azọ́njiawu-liho, e dọ dọdai titengbe de.
JESU—ALIHO LỌ, NUGBO LỌ PO OGBẸ̀ PO
Johanu Baptizitọ lọ Jla Aliho lọ Do
To whenue Falesi po Sadusi delẹ po wá Johanu dè, e gblewhẹdo yé. Etẹwutu?
JESU—ALIHO LỌ, NUGBO LỌ PO OGBẸ̀ PO
Jesu to Jijideji bọ Johanu to Didepo
Devi Johanu Baptizitọ lọ tọn lẹ to awuwhàn dile etlẹ yindọ Johanu ma whànwu.
