Si Juan, nga bata ni Zacarias kag ni Elisabet, nangin manalagna pagdaku niya. Gingamit ni Jehova si Juan para sugiran ang mga tawo nga ang Mesias maabot na. Pero imbes nga magtudlo si Juan sa mga sinagoga ukon sa mga banwa, nagbantala sia sa kamingawan. Ang mga tawo halin sa Jerusalem kag sa bilog nga Judea nagkadto kay Juan para mamati sa iya. Gintudluan niya sila nga para malipay ang Dios sa ila, dapat untatan nila ang paghimo sing malain. Sa tapos makapamati kay Juan, madamo ang naghinulsol sang ila mga sala, kag ginbawtismuhan sila ni Juan sa Suba Jordan.

Simple lang ang kabuhi ni Juan. Ang iya bayo ginhimo halin sa balahibo sang kamelyo kag nagakaon sia sing mga apan kag dugos nga halin sa talon. Gusto gid makilala sang mga tawo si Juan. Bisan ang hambog nga mga Fariseo kag Saduceo nagkadto sa iya. Si Juan nagsiling sa ila: ‘Dapat kamo magbag-o kag maghinulsol. Indi kamo maghunahuna nga espesyal kamo kay nagasiling kamo nga mga anak kamo ni Abraham. Indi buot silingon sini nga mga anak kamo sang Dios.’

Madamo ang nagkadto kay Juan kag namangkot: ‘Ano ang himuon namon agod malipay ang Dios sa amon?’ Si Juan nagsiling sa mga Judiyo: ‘Kon may duha ikaw ka bayo, ihatag mo ang isa sa tawo nga wala sing bayo.’ Kabalo ka bala kon ngaa ginsiling niya ina? Gusto niya nga mahibaluan sang iya mga disipulo nga para malipay ang Dios sa ila, dapat palanggaon nila ang iban nga tawo.

Si Juan nagsiling sa mga manugsukot sing buhis: ‘Indi ninyo pagdayaan ang bisan sin-o.’ Nagsiling sia sa mga soldado: ‘Indi kamo magbaton sing hamham ukon magbinutig.’

 Ang mga saserdote kag mga Levinhon nagkadto kay Juan kag namangkot: ‘Sin-o ka? Gusto ina mahibaluan sang tanan.’ Nagsiling si Juan: ‘Ako ang nagasinggit sa kamingawan, nga nagagiya sa mga tawo kay Jehova, suno sa gintagna ni Isaias.’

Nanamian gid ang mga tawo sa ginatudlo ni Juan sa ila. Madamo ang nagahunahuna kon si Juan bala ang Mesias. Pero ginsilingan niya sila: ‘Magakari ang isa nga mas daku sangsa akon. Indi ako takus sa paghubad sang higot sang iya mga sandalyas. Nagabawtismo ako sa tubig, pero magabawtismo sia sa balaan nga espiritu.’