Johanes, omuzandu waSakarias na Elisabet, tja rira omunene, wa rira omuprofete. Jehova wa ungurisa Johanes okuhonga ovandu kutja Messias me ya. Moruveze rwokuhonga mozondjuwo zomaworonganeno wombongo poo movihuro, Johanes aa zuvarisa mokuti onguza. Ovandu ve ya okuza koJerusalem na koJudea okuyekupuratena ku Johanes. Eye eeve hongo kutja tji mave vanga okutjata ku Mukuru, owo mave sokuisa okutjita oviṋa ovivi. Ovandu ovengi tji va za nokupuratena ku Johanes, ve ritanaura komauvi wawo nu Johanes we ve papitisa mOnḓonḓu Jordan.

Johanes wari nehupo ndi hari noviṋa ovingi. Eye aa zara ozombanda nḓa ungurwa pomainya wongamero nu aa ri ozombahu nouitji wozonywitji. Ovandu aave vanga okutjiwa Johanes. Nandarire Ovafarisei nOvasaduke mba ri overitongamise ve yekumutara. Johanes wa tja ku wo: ‘Eṋe mamu sokutanaura ongaro yeṋu. Amu munu kutja oweṋe ovanahepero mena rokutja mu ritja oweṋe ovanatje vaAbraham. Ihi katji nokuheya kutja oweṋe ovanatje vaMukuru.’

Ovengi ve ya ku Johanes nave pura ave tja: ‘Ngatu tjite vi kutja tu tjate ku Mukuru?’ Johanes wa raera Ovajuda na tja: ‘Tji u nozombanda mbari, kayandje imwe komundu ngu hina yo.’ Mo tjiwa kutja ongwaye tja tja nao? Eye aa vanga kutja ovahongewa ve ve tjiwe kutja tji mave vanga okutjata ku Mukuru, owo mave sokusuvera ovandu.

Johanes wa raera kovasutise votjimariva tjouhona na tja: ‘Rireye ovanauatjiri nu amu tjiti ovineya komundu ngamwa.’ Eye wa raera  ovarwe vovita na tja: ‘Amu kambura ovimariva komundu kotjomasa poo okukora ovizeze.’

Ovapristeri nOvalevi wina ve ya ku Johanes nave mu pura ave tja: ‘Ovandu avehe mave vanga okutjiwa kutja oove uṋe?’ Johanes wa tja: ‘Owami eraka rangu ma ravaere mokuti onguza, ngu ma twara ovandu ku Muhona, otja Jesaja pa heya.’

Ovandu va suverere oviṋa Johanes mbyee ve hongo. Ovengi aave nangarasi Johanes ongu ri Messias. Posiya eye wa tja ku wo: ‘Omundu omunene pu ami me ya. Ami hi nokuyenena okukutura ozongaku ze. Ami mbi papitisa nomeva, posiya eye ma papitisa nOmbepo Ondjapuke.’