John, anak lelaki Sekariah enggau Elisabet, nyadi nabi lebuh iya nyau besai. Jehovah ngena John ngajar orang pasal Messiah ke deka datai. Tang ari ke ngajar ba balai gempuru tauka ba nengeri, John nginjil ba menua puang. Orang mayuh datai ari Jerusalem enggau serata menua Judea laban deka belajar ari John. Iya ngajar sida enti deka ngelantangka ati Petara, sida patut badu ngereja pengawa ti jai. Pengudah ningaka ajar John, mayuh ari sida nesal ati lalu John maptisa sida ba Sungai Jordan.

John idup enggau pengumbas iya. Iya ngena gari ke digaga ari bulu unta sereta makai buntak enggau ai manyi. Orang mayuh deka nemu pasal John. Indah orang Parisi enggau Saduki ti sumbung mega deka betemu enggau iya. John madah ngagai sida: ‘Kita patut ngubah ulah lalu nesal ati. Anang ngumbai diri manah agi ari orang bukai ketegal kita nyebut kita peturun Abraham. Tu ukai reti kita mega anak Petara.’

Mayuh orang datai ngagai John lalu nanya: ‘Nama patut digaga kami ngambika ngelantangka ati Petara?’ John madah ngagai sida: ‘Enti nuan bisi dua lambar baju, beri meh selambar ngagai orang ke begunaka nya.’ Kati nuan nemu kebuah iya madah nya? Iya deka murid iya nemu, enti sida deka ngelantangka ati Petara, sida patut rinduka orang bukai.

John madah ngagai bala pengumpul chukai: ‘Nuan patut lurus lalu anang nipu duit orang.’ Iya madah ngagai bala soldadu: ‘Anang makai suap, tauka bejaku bula.’

 Bala imam sereta orang Lewi mega datai ngagai John lalu nanya iya: ‘Sapa nuan? Semua orang deka nemu pasal nuan.’ Ku John: ‘Aku tu orang ke ngangau di menua puang, mai orang ngagai Jehovah, baka ku dipadah Isaiah.’

Orang mayuh rinduka utai ke diajar John ngagai sida. Sida indah berunding enti John tu Messiah. Tang ku iya madahka sida: ‘Bisi seiku orang ke bekuasa agi ari aku deka datai. Tali selipar iya deh aku enda tau muka. Aku maptisa ngena ai, tang iya deka maptisa ngena roh kudus.’