Mwana wa Nzekalia na Elisavethi, ũla weetawa Yoana nĩwatwʼĩkie mwathani yĩla weanie. Yeova nĩwamũtũmĩie Yoana kũmanyĩsya andũ kana Masia nĩwũkĩte. Ĩndĩ vandũ va Yoana kũmanyĩsya masinakokenĩ na ndũanĩ, aendie kũtavanyʼa weũnĩ. Andũ nĩmaumie Yelusaleme na Yutia yonthe makamanyĩwʼe nĩ Yoana. Amamanyĩisye kana nĩ kana mamwendeesye Ngai, maaĩle kũeka kwĩka maũndũ mathũku. Ĩtina wa kũmwĩthukĩĩsya, andũ aingĩ nĩmaekie kwĩka naĩ, na Yoana amavatisa Ũsĩnĩ wa Yolotani.

Yoana ndaĩ na syĩndũ mbingĩ. Eekĩaa ngũa syaseũvĩtwʼe na wʼĩa wa ngamĩle na aĩsaa ngie kana itoli vamwe na ũkĩ wa nzũkĩ wa kĩthekanĩ. Andũ nĩmendaa mũno kũmwona na kũmwĩthukĩĩsya Yoana. O na Avalisi na Asatukai ala maĩ na ngathĩĩo mũno nĩmaendie kũmwona. Yĩla Yoana wamonie ameie atĩĩ: ‘Nĩmwaĩle kũvĩndũa mwĩkalĩle wenyu na mũieka kwĩka naĩ. Mũikasũanĩe kana mwĩ ma vata mũno aĩ nũndũ mwĩ syana sya Avalaamu. Kwĩthĩwa mwĩ syana sya Avalaamu kũyonanasya kana mwĩ syana sya Ngai.’

Ayuti aingĩ nĩmaendie kũla kwĩ Yoana na mamũkũlya atĩĩ: ‘Twaĩle kwĩka ata nĩ kana tũmwendeesye Ngai?’ Nake Yoana amea atĩĩ: ‘Ethĩwa wĩ na ngũa ilĩ, nenga ĩmwe mũndũ ũla ũkwenda ũtethyo.’ We nĩwĩsĩ nĩkĩ waisye ũu? Yoana endaa amanyĩwʼa make mamanye kana nĩ kenda mamwendeesye Ngai, maaĩle kwenda andũ ala angĩ.

Yoana nĩwasyokie aneena na aumĩthya ma koti na amea atĩĩ: ‘Neenai ũla wʼo na mũikakenge andũ kwa kũmetya koti ũvĩtũkĩte.’  Namo asikalĩ ameie atĩĩ: ‘Mũikavene mũndũ kana kũmũsikatĩa ũndũ wa ũvũngũ.’

Athembi na Alivai o namo nĩmaendie vala ve Yoana na mamũkũlya: ‘We nue ũũ? Kĩla mũndũ nũkwenda kũũmanya.’ Nake Yoana amea: ‘Nyie nĩ mũndũ ũkũneena na wasya mũnene weũnĩ, nĩ kana nĩtongoesye andũ kwa Yeova, o tondũ Isaia wathanie.’

Andũ nĩmendeeiwʼe mũno nĩ maũndũ ala Yoana wamanyĩasya. Aingĩ moonaa Yoana tawe Masia. Ĩndĩ ameie atĩĩ: ‘Ve mũndũ ũngĩ mũnene kwĩ nyie ũkĩte. O na ndyaĩle kũthasya iatũ syake. Nyie nĩvatisaa na kĩwʼũ, ĩndĩ we akavatisaa na veva mũtheu.’