Juan éra fidju di Zakarias ku Elizabeti. Kantu el fika grandi el bira proféta. Jeová uza Juan pa inxina povu ma Misías staba ta binha. Má envês di el inxina na sidadis ô na lugaris di adorason ki éra sinagógas, Juan ta inxinaba na dizértu. Gentis ta binha di Jiruzalen i di tudu Judea pa prende ku Juan. El ta inxinaba es ma si es krê agradaba Deus, es tinha ki paraba di faze kuzas mariadu. Dipôs ki es obi Juan, monti di es rapende di ses pekadu i Juan batiza-s na Riu Jurdon.

Juan tinha un vida sinplis. Se ropa éra di péli di kamelu i el ta kumeba kafanhotu ku mel. Gentis ta krê sabeba ken ki éra Juan. Ti farizeus ku saduseus ki ta daba pa inportanti, bai odja Juan. Juan fla-s: ‘Nhos meste muda nhos konportamentu i rapende. Ka nhos pensa ma nhos é inportanti sô pamodi nhos ta fla ma nhos é fidjus di Abraon. Kel-li ka krê fla ma nhos é fidjus di Deus.’

Monti algen bai pergunta Juan: ‘Kuzê ki nu meste faze pa nu agrada Deus?’ Juan fla-s: ‘Si nhos ten dôs kazaku, nhos da un pa un algen ki meste.’ Bu sabe pamodi ki el fla si? El krê pa es ntendeba ma, pa agrada Deus, es meste trataba algen ku amor.

Juan fla pa kes algen ki ta kobraba inpostu: ‘Nhos ser onéstu i ka nhos ngana ningen.’ El fla kes trópa: ‘Ka nhos seta dinheru pa faze kuza mariadu i nen ka nhos konta mintira.’

 Saserdótis ku levitas tanbê bai pergunta Juan: ‘Bo é kenha? Tudu algen sta ta pergunta.’ Juan fla-s: ‘Ami é un vós di dizértu, ki sta ta leba pesoas pa Jeová, sima proféta Izaías dja flaba.’

Gentis ta gostaba di kuzas ki Juan ta inxinaba es. Txeu ta perguntaba si Juan éra Misías. Má el fla-s: ‘Sta ta ben un algen más grandi ki mi. N ka ta sirbi nen pa dismara-l se sandália. Mi N ta batiza ku agu, má el ta batiza ku spritu santu.’