Laj Juan ralal laj Zacarias ut xʼElisabet. Li Jehobʼa kixxaqabʼ choʼq propeet ut kiroksi re xyeebʼal rehebʼ li poyanam naq chi seebʼ tchalq li Sikʼbʼil Ru. Abʼan inkʼaʼ napuktesink saʼebʼ li tenamit malaj saʼebʼ li chʼutlebʼaal, napuktesink bʼan saʼ chaqichʼochʼ. Naabʼalebʼ li poyanam re Jerusalen ut re chixjunil Judea nekeʼwulak chi rabʼinkil laj Juan. Naxye chaq rehebʼ naq tento teʼxkanabʼ xbʼaanunkil li maaʼusilal re naq li Yos sahaq saʼ xchʼool rikʼinebʼ. Joʼkan naq, naabʼalebʼ keʼxyotʼ xchʼool xbʼaanebʼ li xmaak, ut laj Juan kixkubʼsihebʼ xhaʼ saʼ li nimaʼ Jordan.

Laj Juan moko bʼihom ta. Naxtiqibʼ ribʼ rikʼin rix kameey ut naxwaʼ chaq saakʼ ut xyaʼal kabʼ re kʼicheʼ. Ebʼ li poyanam keʼraj xnawbʼal ani tzʼaqal aʼan. Joʼkan ajwiʼ, ebʼ li qʼetqʼet aj Pariseey ut aj Saduseey keʼwulak rilbʼal. Tojaʼ naq, laj Juan kixye rehebʼ: «Tento teeyotʼ eechʼool ut teejal eenaʼlebʼ. Nekeenima eeribʼ xbʼaan naq nekeeye naq ralalex laj Abrahan, abʼan aʼin moko naraj ta xyeebʼal naq ralalex li Yos».

Naabʼalebʼ nekeʼxpatzʼ re laj Juan: «Kʼaru tqabʼaanu re naq sahaq saʼ xchʼool li Yos qikʼin?». Kixye rehebʼ: «Wi wank wiibʼ eebʼatal, kʼehomaq junaq re li maakʼaʼ re». Ma nakaanaw kʼaʼut kixye aʼin? Laj Juan kiraj naq ebʼ li xtzolom teʼxnaw naq re xsahobʼresinkil xchʼool li Yos tento teʼxra ebʼ li poyanam.

Kixye ajwiʼ rehebʼ laj titzʼol toj: «Mexʼelqʼak chi moko texbʼalaqʼiq». Ut rehebʼ laj puubʼ kixye: «Mextikʼtiʼik chi moko teekʼe eeribʼ chi tuminaak».

 Ebʼ laj tij ut ebʼ laj Levi keʼwulak ajwiʼ rilbʼal laj Juan ut keʼxye re: «Chixjunilebʼ nekeʼraj xnawbʼal anihat tzʼaqal». Laj Juan kixchʼolobʼ: «Laaʼin li xyaabʼ kuxej saʼ li chaqichʼochʼ li naxkʼamebʼ li poyanam rikʼin li Jehobʼa, joʼ kixye chaq li propeet Isaias».

Ebʼ li poyanam kʼajoʼ nekeʼwulak chiru li naxkʼut laj Juan, ut naabʼalebʼ nekeʼraj xnawbʼal ma aʼan li Sikʼbʼil Ru. Joʼkan naq laj Juan kixye: «Chi seebʼ tchalq li jwal nim xwankil chiwu. Moko inkʼulubʼ ta xjitbʼal xkʼaamal li xxaabʼ. Laaʼin ninkubʼsi eehaʼ yal rikʼin haʼ, abʼan aʼan tixkubʼsi eehaʼ rikʼin santil musiqʼej».