Johannes, omonamati waSakaria naElisabet, okwa ninga omuprofeti eshi a kula. Jehova okwa li a longifa Johannes opo a honge ovanhu kutya Messias ote uya. Ponhele yokuhonga moinagoga ile meedolopa, Johannes okwa kala ha udifa mombuwa. Ovanhu ova li have uya tava di kuJerusalem nomuJudea ashishe opo ve uye va pwilikine kuJohannes. Okwa li e va honga kutya opo va kale va hokiwa kuKalunga, ove na okweefa po okulonga owii. Konima eshi va pwilikina kuJohannes, vahapu ova li ve livela ombedi omolwomatimba avo, na Johannes okwa li e va ninginifa momulonga waJordan.

Onghalamwenyo yaJohannes oya li paunafangwa. Okwa li ha djala oikutu ya ningwa molududi leengamelo nokwa li ha li oshipaxu nosho yo omaadi eenyiki. Ovanhu ova li va hala okumona Johannes. Nokuli nOvafarisai nOvasadukai ovo ve na ounhwa ova li ve uya oku mu tala. Johannes okwe va lombwela a ti: ‘Omwa pumbwa okulundulula elihumbato leni ndele tamu lialuluka. Inamu diladila kutya omwa fimana molwaashi otamu ti kutya nye oludalo laAbraham. Osho inashi hala kutya nye ovana vaKalunga.’

Vahapu ova li ve uya kuJohannes ndele tave mu pula tava ti: ‘Otwa pumbwa okuninga shike opo tu hafife Kalunga?’ Johannes okwa lombwela Ovajuda ta ti: ‘Ngeenge ou na oikutu ivali, yandja shimwe kwaau eshi pumbwa.’ Mbela ou shii kutya omolwashike a popya ngaho? Okwa li a hala ovahongwa vaye va shiive kutya opo va hafife Kalunga, ove na okukala ve hole ovanhu.

Johannes okwa li a lombwela ovafendelifi a ti: ‘Kaleni mu na oshili ndele inamu kengelela nande omunhu.’ Opo nee okwa lombwela vali ovakwaita ta ti: ‘Inamu tambula ombubo ile mu popye oipupulu.’

 Ovapristeri nOvalevi navo ova li ve uya kuJohannes ndele tave mu pula tava ti: ‘Oove lyelye? Keshe umwe okwa li a hala oku mu shiiva.’ Johannes okwa nyamukula a ti: ‘Ame ondaka tai udika mombuwa, handi kwafele vamwe va shiive Jehova, ngaashi ashike Jesaja a xunganeka.’

Ovanhu ova li ve hole osho Johannes te va hongo. Vahapu ova li tave lipula ngeenge Johannes oye Messias. Ashike okwe va lombwela a ti: ‘Ope na umwe e dule nge te uya. Ame inandi wana nokuli nokumangulula eenghaku daye. Ame ohandi ninginifa nomeva, ashike ye ota ninginifa nomhepo iyapuki..’