មេរៀនទី៧៣
យ៉ូហានរៀបចំផ្លូវសម្រាប់លោកយេស៊ូ
នៅពេលយ៉ូហានកូនប្រុសរបស់សាការីនិងអេលីសាបិតធំឡើង គាត់បានទៅជាអ្នកប្រកាសទំនាយ។ ព្រះយេហូវ៉ាបានចាត់យ៉ូហានឲ្យទៅបង្រៀនបណ្ដាជនថាមេស្ស៊ីនឹងមក។ ប៉ុន្តែ ជាជាងបង្រៀននៅក្នុងសាលាប្រជុំឬក្នុងក្រុង យ៉ូហានបានបង្រៀននៅក្នុងតំបន់ស្ងាត់ជ្រងំ។ មនុស្សពីក្រុងយេរូសាឡិមនិងពីតំបន់យូឌាទាំងមូល បានមករៀនពីយ៉ូហាន។ គាត់បង្រៀនពួកគេថា បើចង់ធ្វើឲ្យព្រះពេញចិត្ត ពួកគេត្រូវឈប់ប្រព្រឹត្តអំពើអាក្រក់ទៀត។ បន្ទាប់ពីឮដូច្នោះ មនុស្សជាច្រើនបានប្រែចិត្តពីអំពើខុសឆ្គងរបស់ខ្លួន រួចយ៉ូហានបានជ្រមុជទឹកឲ្យពួកគេក្នុងទន្លេយ៉ូដាន់។
យ៉ូហានមានជីវិតសាមញ្ញណាស់។ គាត់ស្លៀកសម្លៀកបំពាក់ធ្វើពីរោមសត្វអូដ្ឋ ហើយបរិភោគសត្វកណ្ដូប និងទឹកឃ្មុំព្រៃជាអាហារ។ មនុស្សគ្រប់គ្នាចង់ដឹងថាយ៉ូហានជាអ្នកណា សូម្បីតែពួកផារិស៊ីនិងពួកសាឌូស៊ីដ៏មានអំណួត ក៏បានមកជួបគាត់ដែរ។ យ៉ូហានប្រាប់ពួកគេថា៖ ‹អ្នករាល់គ្នាត្រូវផ្លាស់ប្ដូររបៀបរស់នៅ ហើយប្រែចិត្ត។ កុំគិតថាអ្នករាល់គ្នាពិសេសជាងមនុស្សឯទៀត ដោយសារអ្នករាល់គ្នាជាកូនចៅរបស់អាប្រាហាំឡើយ។ នេះមិនមានន័យថា អ្នកជាកូនព្រះទេ›។
ជនជាតិយូដាជាច្រើនបានមកជួបយ៉ូហាន ហើយសួរថា៖ ‹តើយើងត្រូវធ្វើអ្វីដើម្បីឲ្យព្រះពេញចិត្ត?›។ យ៉ូហានប្រាប់ពួកគេថា៖ ‹បើអ្នករាល់គ្នាមានអាវពីរ ចូរចែកអាវមួយដល់អ្នកដែលត្រូវការ›។ តើអ្នកដឹងទេ ហេតុអ្វីយ៉ូហាននិយាយដូច្នេះ? ពីព្រោះគាត់ចង់ឲ្យពួកអ្នកកាន់តាមគាត់យល់ថា ដើម្បីឲ្យព្រះពេញចិត្ត ពួកគេត្រូវស្រឡាញ់អ្នកឯទៀត។
យ៉ូហានប្រាប់ពួកអ្នកយកពន្ធថា៖ ‹អ្នកត្រូវស្មោះត្រង់ ហើយកុំបោកប្រាស់គេ›។ គាត់ប្រាប់ពួកទាហានថា៖ ‹កុំទទួលសំណូក ឬនិយាយកុហកឡើយ›។
ពេលពួកសង្ឃនិងពួកលេវីមកជួបយ៉ូហាន ពួកគេសួរគាត់ថា៖ ‹មនុស្សគ្រប់គ្នាចង់ដឹងថា តើអ្នកជាអ្នកណា?›។ យ៉ូហានឆ្លើយថា៖ ‹ខ្ញុំជាសំឡេងនៅតំបន់ស្ងាត់ជ្រងំ ដែលកំពុងនាំបណ្ដាជនទៅឯព្រះយេហូវ៉ា ដូចអ្នកប្រកាសទំនាយអេសាយបានប្រាប់›។
បណ្ដាជនចូលចិត្តអ្វីដែលយ៉ូហានបង្រៀន។ ពួកគេជាច្រើនគិតថាយ៉ូហានជាមេស្ស៊ី។ ប៉ុន្តែ គាត់ប្រាប់ពួកគេថា៖ ‹លោកដែលមកក្រោយខ្ញុំ គឺខ្លាំងជាងខ្ញុំ។ សូម្បីតែខ្សែស្បែកជើងរបស់លោក ក៏ខ្ញុំមិនសមនឹងស្រាយជូនលោកដែរ។ ខ្ញុំជ្រមុជអ្នករាល់គ្នាក្នុងទឹក តែលោកនឹងជ្រមុជអ្នករាល់គ្នាដោយឫទ្ធានុភាពបរិសុទ្ធ›។
«គាត់បានមកធ្វើជាសាក្សីបញ្ជាក់អំពីពន្លឺ ដើម្បីឲ្យមនុស្សគ្រប់ប្រភេទជឿតាមរយៈគាត់»។—យ៉ូហាន ១:៧