တၢ်မၤလိ ၇၃
စီၤယိၤဟၣ်ကတဲာ်ကတီၤဝဲကျဲ
စီၤယိၤဟၣ်မ့ၢ်ဝဲ စီၤစဃၤရံဒီးနီၢ်အ့းလံၤစါဘ့းအဖိခွါလီၤ. ဒီးလၢခံဖဲ စီၤယိၤဟၣ်ဒိၣ်ထီၣ်အခါန့ၣ် အဝဲကဲထီၣ်ဝဲဝံတဂၤလီၤ. ယဟိဝၤယွၤသူဝဲ စီၤယိၤဟၣ်လၢ ကစံၣ်တဲၤတဲလီၤတၢ်ဘၣ်ဃးဒီး မ့းၡံအၤကဟဲအဂ့ၢ်န့ၣ်လီၤ. စီၤယိၤဟၣ်တစံၣ်တဲၤတဲလီၤတၢ်လၢ ဘူၣ်ဘျီၣ်ဒီးလၢဝ့ၢ်အပူၤဘၣ်. လၢတၢ်န့ၣ်အလီၢ် စီၤယိၤဟၣ်စံၣ်တဲၤတဲလီၤတၢ်လၢ ပှၢ်မုၢ်ကနၢအပူၤလီၤ. ကယဲၢ်ပှၤအိၣ်လၢ ဝ့ၢ်ယရူၤၡလ့ၣ်ဒီး ကီၢ်ယူဒၤအပူၤန့ၣ် လဲၤဝဲလၢစီၤယိၤဟၣ်အအိၣ်ဒ်သိး ကမၤလိန့ၢ်တၢ်လၢအအိၣ်လီၤ. ဒ်သိးပှၤဂီၢ်မုၢ် ကမၤတၢ်ဘၣ်ယွၤအသးအဂီၢ် စီၤယိၤဟၣ်သိၣ်လိဝဲလၢ အဝဲသ့ၣ်တဘၣ် မၤတၢ်အၢတၢ်သီလၢၤဘၣ်. ဖဲပှၤဂီၢ်မုၢ်နၢ်ဟူစီၤယိၤဟၣ် အတၢ်သိၣ်တၢ်သီတဖၣ် ဝံၤအလီၢ်ခံအဝဲသ့ၣ်အါဂၤ ပီၢ်ယၢ်လီၤက့ၤအသး ဒီးစီၤယိၤဟၣ် ဒိးဘျၢအဝဲသ့ၣ်လၢ ထံကျိယၢ်ဒ့ၣ်အပူၤလီၤ.
စီၤယိၤဟၣ်အိၣ်မူဝဲ ယိယိဖိလီၤ. အဝဲကူကၤဝဲအဆ့လၢ ကီၤလၤအူးအဆူၣ်ဒီး အတၢ်အီၣ်န့ၣ် မ့ၢ်ဝဲ ဒွဲၣ်တဖၣ်ဒီးကနဲစီလီၤ. ပှၤဂီၢ်မုၢ်အဲၣ်ဒိးသ့ၣ်ညါအါထီၣ် ဘၣ်ဃးဒီးစီၤယိၤဟၣ်အဂ့ၢ်လီၤ. ပှၤဖၤရံၤၡဲဒီး ပှၤစးဒူၤကဲဖိတဖၣ် လၢအပာ်ထီၣ်ထီအသးန့ၣ် ဟဲထံၣ်လိာ်သးဒီးစီၤယိၤဟၣ်စ့ၢ်ကီးလီၤ. စီၤယိၤဟၣ်တဲဘၣ်အဝဲသ့ၣ်လၢ– ‘သုကဘၣ်ဆီတလဲသုတၢ်အိၣ်မူ ဒီးပီၢ်ယၢ်လီၤက့ၤသုသးလီၤ. သုတဘၣ်ဆိကမိၣ်လၢ သုမ့ၢ်ပှၤလီၤဆီတဒူၣ်ခီဖျိလၢ သုမ့ၢ်စီၤအၤဘြၤဟၣ်အဖိန့ၣ်တဂ့ၤ. သုမ့ၢ်တပီၢ်ယၢ်လီၤက့ၤသုသးန့ၣ် ယွၤတတူၢ်လိာ်သုဘၣ်.’
ပှၤအါဂၤဟဲလၢစီၤယိၤဟၣ်အအိၣ် ဒီးသံကွၢ်အီၤလၢ– ‘ဒ်သိးပကမၤသးခု ယွၤအသးအဂီၢ် ပကဘၣ်မၤတၢ်မနုၤလဲၣ်.’ စီၤယိၤဟၣ်တဲဘၣ် အဝဲသ့ၣ်လၢ– ‘သုဆ့ကၤမ့ၢ်အိၣ်ခံဘ့ၣ်န့ၣ် ဟ့ၣ်လီၤတဘ့ၣ်ဆူ ပှၤလၢအလိၣ်ဘၣ်အီၤတက့ၢ်.’ ဘၣ်မနုၤအဃိ စီၤယိၤဟၣ်တဲဝဲဒ်န့ၣ်လဲၣ်. စီၤယိၤဟၣ်ပာ်ဖျါထီၣ်ဝဲလၢ အပျဲၢ်အဘီၣ်တဖၣ် မ့ၢ်အဲၣ်ဒိး မၤသးခုယွၤအသးန့ၣ် အဝဲသ့ၣ်ကဘၣ် အဲၣ်ပှၤလၢအဃၢၤလီၤ.
စီၤယိၤဟၣ်တဲဘၣ် ပှၤထၢတၢ်ခိတၢ်သွဲတဖၣ်လၢ– ‘မၤတၢ်တီတီလိၤလိၤ ဒီးလီအီၣ်ပှၤဂၤတဂ့ၤ.’ ဒီးစီၤယိၤဟၣ်တဲဘၣ် ပှၤသုးဖိတဖၣ်လၢ– ‘တဘၣ်လံၣ်အီၣ်လီအီၣ်တၢ်တဂ့ၤ.’
ပှၤလုၢ်တၢ်အဒိၣ်ဒီး ပှၤလ့ၤဝံဖိတဖၣ် ဟဲစ့ၢ်ကီးလၢ စီၤယိၤဟၣ်အအိၣ် ဒီးသံကွၢ်ဝဲလၢ– ‘နမ့ၢ်မတၤတဂၤလဲၣ်. ပှၤကိးဂၤဒဲးအဲၣ်ဒိးသ့ၣ်ညါဝဲလီၤ.’ စီၤယိၤဟၣ်တဲဆၢက့ၤ အဝဲသ့ၣ်လၢ– ‘ယမ့ၢ်တၢ်ကလုၢ်လၢပှၢ်မုၢ်ကနၢလၢ အဆှၢပှၤဂီၢ်မုၢ်ဆူ ယဟိဝၤယွၤအအိၣ် ဒ်ဝံယၡါယၤတဲဆိပာ်ဝဲအသိးလီၤ.’
တၢ်လၢစီၤယိၤဟၣ် သိၣ်လိဝဲန့ၣ် ပှၤဂီၢ်မုၢ်ဘၣ်သူၣ်ဘၣ်သးဝဲဒိၣ်မးလီၤ. ပှၤအါဂၤအဲၣ်ဒိးသ့ၣ်ညါဝဲလၢ စီၤယိၤဟၣ်မ့ၢ်မ့းၡံအၤဧါ. ဘၣ်ဆၣ် စီၤယိၤဟၣ်တဲဘၣ်အဝဲသ့ၣ်လၢ– ‘ပှၤလၢအကဟဲလၢခံတဂၤန့ၣ် အဝဲဒိၣ်န့ၢ်ယၤလီၤ. ယဃဲၣ်လီၤကွံာ်အခီၣ်ဖံးမး တကြၢးဘၣ်. ယဒိးဘျၢသုလၢထံ ဘၣ်ဆၣ် အဝဲကဒိးဘျၢသုလၢသးစီဆှံလီၤ.’
“ဒ်သိး ပှၤခဲလၢာ် ကစူၢ်က့ၤနာ်က့ၤတၢ်လၢအီၤဒီး, အဝဲဒၣ် ဟဲလၢတၢ်အုၣ်အသးအဂီၢ်, ဒ်သိး အကအုၣ်အသးလၢ တၢ်ကပီၤအဂ့ၢ်လီၤ.”—ယိၤဟၣ် ၁:၇
