Yoani umwana umonsi wakwe Zakaliya na nyina Elizabeti, wizile aya kasesema lino wakuzile. Yeova waomvizye Yoani ukusambilizya antu pa kwiza kwakwe Mesiya. Nomba umu cifulo cakuti Yoani asambilizya umu sunagogi nanti umu matauni, wene wasimikilanga umu lwanga. Antu ukufuma umu Yelusalemu nu mu Yudeya yayanga kuli Yoani kuti yasambilile. Wayasambilizyanga ukuti, pakuti yazanzya Leza yaalinzile ukuta ukucita iviipe. Pa cisila icakuvwa kuli vino Yoani wayasambilizyanga, antu aingi yalapilanga nupya wayabatizyanga umu Luzi Lwa Yodani.

Yoani wangupizye umi. Wazwalanga ivyakuzwala ivyapangilwa na mavumbu ya ngamali nupya walyanga makanta nu uci. Antu yalondesyanga ukumanya Yoani. Na Afaliseo na Asaduki aali ni cilumba yaile umu kumulola. Yoani wayaneenyile ati: ‘Mulinzile ukuta vino mukacita nu kulapila. Mutaelenganya ukuti mwacindama pa mulandu sile uwakuti mukati mwemwe ana yakwe Abulamu. Cii cisikupiliula ukuti mwemwe ana yakwe Leza.’

Antu aingi yayanga kuli Yoani nu kumuzya iyati: ‘I vyani vino tulinzile ukucita pakuti twazanzya Leza? Yoani waneenyile Ayuda ati: ‘Ndi cakuti mwakwata ivyakuzwala viili, mupeele conga kuli wino atakweti.’ Uzye watumanya umulandu uno wayaneenile vivyo? Walondanga alondezi yakwe yamanye ukuti pakuti yazanzya Leza, yalondekwanga ukutemwa antu yonsi.

Yoani waneenyile ya kasonkesya ati: ‘Mwaya na ucisinka nupya mutabepa aliwensi.’ Waneenyile asilika ati: ‘Mutapoka mafisakanwa nanti ukulanda ufi.’

 Ya simapepo na Ina Levi yaile kuli Yoani nu kumuzya iyati: ‘Uzye wewe weni? Antu yonsi yakulonda ukukumanya.’ Yoani watiile: ‘Neene indi izwi ilikuvwika umu lwanga, ilikutungulula antu kuli Yeova wakwe vino Ezaya wasoowile.’

Antu yatemilwe vino Yoani wasambilizyanga. Aingi yelenganyanga ukuti Yoani ali Mesiya. Lelo wayaneenanga ati: ‘Kuli umwi akwiza umukalamba pali neene. Ntalinzile nu kusapula intambo izya ku ndyatu zyakwe. Nemo nkabatizya umu manzi, lelo wene alaabatizya nu mupasi wa muzilo.’