A Zakari ne a Elizabɛt biig a Zã sẽn wa n bɩ wã, a lebga no-rɛɛsa. A Zeova kɩtame t’a Zã wilg nebã tɩ Mesi wã watame. La pa zʋɩf-rãmbã karen-dotẽ wã bɩ tẽnsã pʋsẽ la a ra zãmsd nebã ye. Ra yaa weoogẽ wã. Nebã ra yita Zerizalɛm la Zide tẽns wʋsg n wat n kelgd a Zã. A wilg-b lame tɩ b sã n dat n ta Wẽnnaam yam, b pa segd n le maan sẽn yaa wẽng ye. Nebã sẽn kelg a Zã wã, wʋsg toeemame, t’a lis-b Zʋrdẽ kʋɩlgẽ wã.

A Zã ra ningda fut sẽn maan ne yʋgemd kõbdo. A ra wãbda sʋy la a rɩt weoogẽ sɩɩdo. A ra ka baood bũmb wʋsg ye. Nebã fãa ra rat n bãnga a Zã sẽn yaa ned ninga. Baa Fariziẽ-rãmbã ne Sadiseẽ-rãmbã sẽn yaa wuk-m-mens rãmbã waa a Zã nengẽ, t’a yeel-b yaa: ‘Yãmb me segd n basa y tʋʋm-wẽnsã. Ra tags-y tɩ y yɩɩda neb a taabã, y sẽn yet tɩ y yaa a Abrahaam kambã yĩng ye. Woto pa wilgd tɩ y yaa Wẽnnaam kamb ye.’

Neb wʋsg wa n soka a Zã yaa: ‘Bõe la d segd n maan n tõog n ta Wẽnnaam yam?’ La a leok-b lame: ‘Ned sã n tar fut a yiibu, bɩ a yãk a ye n kõ ned ning sẽn ka tare.’ Fo mii bũmb ning sẽn kɩt t’a yeel woto wã bɩ? A ra ratame tɩ nebã bãng tɩ b sã n dat n ta Wẽnnaam yam, b segd n nonga b taabã.

A Zã yeela yõor yaood deegdbã yaa: ‘Da zãmb-y ned ye.’ A yeela sodaasã me yaa: ‘Da maan-y ned pãnga, bɩ n yag ziri ye.’

Maan-kʋʋdbã ne Levi rãmbã me wa n yeela a Zã yaa: ‘Nebã fãa rat n bãnga fo sẽn yaa ned ninga.’ La a Zã yeel-b lame:  ‘Mam yaa ned ning sẽn be-a weoogẽ, n kelemd n yet nebã tɩ b lebg n wa a Zeova nengẽ, wa no-rɛɛs a Ezayi sẽn da reng n togsã.’

Nebã sũur da nooma ne a Zã sẽn zãmsd-b bũmb ningã. Wʋsg ra sokda b mens sã n yaa yẽ n yaa Mesi wã. La a yeel-b lame yaa: ‘Ned sẽn yɩɩd maam n wate. Mam pa zems tɩ lok a neooda wã wĩy ye. Mam lisda nebã koom pʋgẽ, la yẽ na n lisa nebã vʋʋsem sõng pʋgẽ.’