LEZZJONI 73
Ġwanni jipprietka li ġej il-Messija
Ġwanni, it-tifel taʼ Żakkarija u Eliżabetta, meta kiber sar profeta. Ġeħova uża lil Ġwanni biex jgħallem lin-nies dwar li kien ġej il-Messija. Imma minflok ma qagħad jgħallem fis-sinagogi jew fl-irħula, Ġwanni pprietka fid-deżert. In-nies ġew minn Ġerusalemm u mil-Lhudija kollha biex jitgħallmu mingħandu. Hu għallimhom li biex jogħġbu lil Alla jridu jieqfu jagħmlu affarijiet ħżiena. Wara li semgħu lil Ġwanni, ħafna ddispjaċiehom għad-dnubiet li għamlu, u Ġwanni għammidhom fix-Xmara Ġordan.
Ġwanni għex ħajja sempliċi. Hu kien jilbes ħwejjeġ magħmulin mix-xagħar tal-ġemel u kien jiekol il-ġurati u l-għasel salvaġġ. In-nies kienu kurjużi dwar Ġwanni. Anki l-Fariżej u s-Sadduċej ġew biex jaraw min kien. Hu qalilhom: ‘Intom għandkom tibdlu ħajjitkom u tindmu. Ara ma taħsbux li intom speċjali għax tgħidu li intom ulied Abraham. Għax dan ma jfissirx li intom ulied Alla.’
Ħafna ġew għand Ġwanni u staqsewh: ‘Xi rridu nagħmlu biex nogħġbu lil Alla?’ Ġwanni qal lil dawn il-Lhud: ‘Jekk għandkom żewġ ilbiesi, agħtu waħda lil min m’għandux.’ Taf għala wiġibhom hekk? Hu riedhom ikunu jafu li biex jogħġbu lil Alla jridu jħobbu lin-nies.
Ġwanni qal lill-kolletturi tat-taxxa: ‘Kunu onesti u tqarrqu b’ħadd.’ U lis-suldati qalilhom: ‘Taċċettawx flus biex tagħmlu xi pjaċir lil xi ħadd jew tgħidu l-gideb.’
Anki xi qassisin u Leviti ġew għand Ġwanni, u staqsewh: ‘Int min int? Għax kulħadd irid ikun jaf.’ Ġwanni qalilhom: ‘Jien leħen taʼ xi ħadd li qed jgħajjat fid-deżert li qed jiggwida lin-nies lejn Ġeħova, bħalma kien bassar Isaija.’
In-nies kienu jieħdu pjaċir b’dak li kien jgħallimhom Ġwanni. Ħafna bdew jitħassbu jekk hu kienx il-Messija. Imma hu qalilhom: ‘Ġej xi ħadd li hu aqwa minni. Lanqas biss jistħoqqli li nħoll is-sandli tiegħu. Jien ngħammed bl-ilma, imma hu se jgħammed bl-ispirtu qaddis.’
“Dan ġie biex jagħti xiehda, sabiex jixhed dwar id-dawl, biex kull xorta taʼ nies jemmnu permezz tiegħu.”—Ġwanni 1:7