Juan itatauaj eliyayaj Zacarías uan Elisabet. Jehová kitekimakak kej tlajtolpanextijketl uan kiiljuik ma tematilti Mesías nechka asiskia. Juan amo tlajtolmoyajki ipan altepemej yon ipan sinagogas, ya tlajtolmoyajki ipan uaktok tlali. Miakej maseualmej tlen Jerusalén uan Judea kiontlakakiliyayaj Juan. Ya kiniljuiyaya tlaj kinekiyayaj kiyolpakiltisej toTeotsij monekiyaya ayokmo kichiuasej tlen amo kuali. Yeka miakej moyolkuepkej uan Juan kinatsonpoliuiltik ipan ueyatl Jordán.

Juan amo tlapijpixtoya. Iyoyo kichijchijtoyaj ika camello iijuiyo uan kinkuayaya chapolimej uan nektli. Maseualmej nojua kinekiyayaj kiixmatisej. Kema nopa fariseos uan saduceos katli moueyimatiyayaj kiitatoj Juan, ya kiniljuik: “Moneki inmoyolkuepasej uan inmoyolpatlasej. Amo ximoiljuikaj inkuajkualmej san pampa inkiijtouaj Abraham inmotata. Pampa nopa amo kiijtosneki toTeotsij nojkia eli inmotata”.

Miakej kitlajtlaniliyayaj Juan: “¿Tlake moneki tijchiuasej uan kiampa tijyolpakiltisej toTeotsij?”. Ya kinnankiliyaya: “Tlaj inkipiaj ome inmoyoyo, xijmakakaj se katli amo kipia”. ¿Tijmati kenke kiniljuik nopa? Pampa Juan kinekiyaya itokilijkauaj ma kimatikaj tlaj kinekiyayaj kiyolpakiltisej toTeotsij monekiyaya kiniknelisej sekinok.

Juan nojkia kiniljuik katli tlainamayayaj impuestos: “Amo xitlachtekikaj uan amo xitekajkayauakaj”. Uan nopa soldados kiniljuik: “Amo xiistlakatikaj uan xipakikaj san ika tlen inkitlanij”.

 Sacerdotes uan levitas nojkia kiitatoj Juan uan kiiljuijkej: “Nochi maseualmej kinekij kimatisej ajkia ta”. Juan kiniljuik: “Na san nikinpaleuia maseualmej ma kiixmatikaj Jehová, kej kiijtojtoya tlajtolpanextijketl Isaías”.

Maseualmej kinpaktiyaya tlen Juan kinmachtiyaya uan kinekiyayaj kimatisej tlaj ya eliyaya nopa Mesías. Yeka Juan kiniljuik: “Nechka ualas se katli kipia miak chikaualistli, amo kej na. Uan amo kinamiki yon nijkixtilis itekak. Na niinmechatsonpoliuiltia ika atl uan ya inmechmakas toTeotsij itonal”.