Zacarías uan Elisabet okipiayaj se inkone tlen omotokayotiaya Juan. Jehová okitlali ken teotlajtojki uan okitekitilti para kitematiltiskia san niman ualaskia Mesías. Pero Juan amo otetlapouiaya itech uejueyij altepemej nion itech sinagogas, ye otetlapouiaya kanin tlauaki. Miakej akinmej ochantiayaj Jerusalén uan Judea oyayaj kikakitiuij Juan. Ye okinmiluiaya ayakmo ma kichiuakan tlen amo kuali uan ijkon kiyolpaktiskiaj toTajtsin Dios. Ik non, miakej omoyolkuepkej uan Juan okinapolakti ijtik aueyatl Jordán.

Juan amo okipiaya miak tlamantli. Ye omotlakentiaya ika itsonkal camello uan okikuaya chapulimej uan neujtli. Miakej okinekiayaj kixmatiskej. Hasta fariseos uan saduceos tlen omoueyinekiayaj okitatoj. Juan okinmilui: “Ximoyolkuepakan uan xikpatlakan namoyelis. Nankineltokaj nanueyititokej porque nankijtoaj Abrahán namotajtsin, pero non amo kijtosneki namotajtsin Dios”.

Miakej okitlajtlaniayaj Juan: “¿Ken uelis tikyolpaktiskej toTajtsin Dios?”. Uan ye okinnankiliaya: “Tla nankipiaj ome namotlaken, xikmakakan se akin amo itlaj kipia”. ¿Tikmati tleka ijkon okinmiluiaya Juan? Porque okinekiaya imachtijkauan ma tetlasojtlakan uan ijkon kiyolpaktiskiaj toTajtsin Dios.

Juan noijki okinmilui akinmej okololoayaj tomin: “Nochipa xikijtokan tlen melauak uan amo xitlakajkayauakan”. Uan okinmilui soldados: “Amo xitlakajkayauakan nion xikselikan tomin para nankichiuaskej tlen amo kuali”.

 Teopixkej uan levitas noijki okitatoj Juan uan okiluijkej: “Nochtin kinekij mitsixmatiskej”. Juan okinyekilui: “Ijkon ken okijto teotlajtojki Isaías, ne se tlajtoli tlen mokaki kanin tlauaki uan kinpaleuia oksekimej ma kixmatikan Jehová”.

Miakej okinpaktiaya tlen otlamachtiaya Juan uan okinekiayaj kimatiskej kox ye okatka Mesías. Ik non, Juan okinmilui: “San niman uits se tlakatl okachi ueyititok amo ken ne. Nion nechnamiki nikintotomilis ikakuan. Ne onamechapolakti ika atl, pero ye namechapolaktis ika espíritu santo”.