Yohani mwaana a Sakariya ni Elisapeti, aakhala mulipa a miririmu vaavaa innunweiye. Yehova aampharihela muteko wi aahusihe achu sa orwa wa Mesiya. Nyenya ohiyana wi analaleerya mu sinakooka naari mmicecheni, Yohani aanaya mutakhwani wi alaleerye. Achu yaanarwa o Yerusalemu ni o Yuteya woothewene wi ehuserye moorweela wa Yohani. Owo aanahusiha wi yaariki emuhakalalihe Muluku yaaphwanela ohiya meerelo aya oonanara. Vaavaa yaawiriyannaaya yeeyo Yohani aahusinheiye, achu ancipale yaanacharuwa soocheka saya nave yaanapatisiwa Mmuhice Yortano.

Yohani aakhalano ekumi yookhweya. Yoowara awe yaari ya mapururu a mwaaxinama nave yoolya awe yaari misope ni oravu. Achu yaanakhala ootikhiniheya ni Yohani. Afarisi ni Asatuki yaanaya wa yoowo wi emoone. Yohani aanaaleela: ‘Murukunuxe murima anyu nave mucharuwe. Muhuupuwele muriki Aparahamu tori tiithi anyu. Ela henataphulela wi mwa anamwane a Muluku.’

Achu ancipale yaanaya wa Yohani enamukoha: ‘Echu taani nnaphwanelaahu weera wi naakhele ekumi yoohimala?’ Owo aanawaakhula ariki: ‘Orino soowara piili akuxe emoha amvahe ole ohirino.’ Onnasuwela ntakhara heeni aaloceiye yeeyo? Achuna wi oohuserya awe esuwele wi yaariki emuhakalalihe Muluku, yaaphwanela waasivelaka akina.

Yohani aaloca wa alipa a musokho: ‘Muhivekeke opwaha vaava murummwalaanyuvo.’ Voocharela aaloca ni anakhoco: ‘Ahikhale muneeraanyu mmuhooxeke naari mmootheryeke.’

 Anamukucho ni Alevi yaaya wa Yohani emukoha eriki: ‘Weyaano waani?’ Owo aawakhula: ‘Miyaano ka nsu nnakhuwela mutakhwani. Mukookele ephiro ya Apwiya, ntoko aalonceiye mulipa a miririmu Isaiya.’

Achu yaanasiveliwa ni ohusiha wa Yohani. Nave yuupuwela wi Yohani aari Mesiya. Nyenya owo ahaaleela: ‘Onnarwa yoowo ori mutokweene okipwaha miyo, nave miyo nkinaphwanela naari mano wuurama wi kitaphule isapatu sawe. Miyo kinoopatisaani ni maahi, nto owo oni oopatisekeeni ni munepa waweela.’